Ya pa añanan largo Aruba tin problema cu populacion grandi di pushi y cacho di caya. E solucion no ta pa hiba e bestianan aki ‘kill cage’. Pero e solucion real ta pa frena e problematica di e multiplicacion di un promedio di 11.000 cacho y pushi den un periodo di 5 aña.
E unico manera ta pa sterilisa tur cacho y pushi na Aruba. Bucuti & Tara Beach Resort, na fin di 2015 a lansa e proyecto di ‘Stimami Sterilisami’ pa asina yuda nos isla frena e problema aki. Un plataforma sumamente exitoso, unda cu a traha cu tur veterinario, conhuntamente cu fundacionnan pa asina motiva pueblo di Aruba pa trece cacho crioyo y pushinan pa sterilisa. Den e siguiente fase di ‘Stimami Sterilisami” na 2017, a opta pa enfoka riba fundacionnan oficial cu ta traha duro diariamente pa salba cacho y pushi di caya na Aruba. Te awor 4,500 cacho y pushi a opera cu subsidio di e programa. Danki na contribucion financiero di Aruba Tourism Authority, Aruba Tourism Product Enhancement Fund, y
Bucuti & Tara Beach Resort por continua cu e programa di ‘Stimami Sterilisami’ cu un fase nobo cual lo trece progreso mas liher.
Despues di a evalua e necesidad continuo y e exito di e programa, por anuncia cu ‘Stimami Sterilisami’ lo cubri gastonan completo di fundacionnan pa e operacionnan di cacho y pushi di caya te cu fin di 2017. Esaki ta danki
un biaha mas na Bucuti & Tara Beach Resort, Aruba Tourism Authority y Aruba Tourism Product Enhancement Fund cu ta sigui sostene e causa y metanan di ‘Stimami Sterilisami’ pa resto di e aña aki. Lo keda traha cerca cu fundacionnan cu ta registra y aproba pa asina frena e problema di cacho y pushinan di caya. Nos mester ta consciente cu un poblacion grandi di pushi y cacho sin cuido di doño responsabel ta causa: un peliger cu cacho por ataka hende riba caya, un imagen negativo pa nos pais, y hopi sufrimento di e criaturanan di hamber y malesa. Ademas ta un hecho cruel cu mas di 7000 cacho y pushi ta perde nan bida tristemente den “afmaakhok” tur aña. Bucuti & Tara Beach Resort ta sumamente contento y agradeci di por a conta cu confianza un biaha mas di su partnernan pa e sosten di e programa ‘Stimami Sterilisami’. Ta di admira e trabounan incansabel di tur e fundacionnan pa nos comunidad. A la vez ta encurasha tur doño di cacho y pushi pa sterilisa nan mascota y yuda nos pais yega na e solucion di reduci e poblacion di cacho y pushi indesea.
