E aña aki atrobe Stichting Epilepsie Aruba (SEA) cu for di aña 2017 ta dunando e comunidad di Aruba informacion riba tereno di epilepsia, ta celebra Purple Day.
Purple Day ta un evento internacional cu e meta pa conscientisa e comunidad riba epilepsia cu ta wordo teni tur aña riba 26 di Maart. E evento aki a wordo funda na 2008 na Canada door di Cassidy Megan di 9 aña cu sosten di e organisacion di epilepsia di Nova Scotia. Cu esaki Cassidy cu tawata sufri di e malesa aki, kier a logra cu e persona cu tin epilepsia, no kere of sinti cu e ta su so pa asina combersa cu otro y informa otro tocante epilepsia. Di e forma aki lo por elimina mito- y taboenan riba e malesa aki.
Na 2009 e organisacion di epilepsia di Canada y esun di New York na Merca a uni forsa y asina Purple day a bira internacional. A scoge pa e color biña, lavendel, bira e color internacional pa epilepsia y p’esey ta pidi pa mas tanto posibel hendenan bisti na biña riba e fecha di 26 di Maart.
Miyones di hende ta sufri di epilepsia y na Aruba tambe tin hopi hende cu e problema ey y ta p’esey a lanta SEA pa duna informacion na nos comunidad riba e malesa aki.
SEA ta basta activo riba e tereno aki y regularmente ta duna lectura na scolnan y hopi otro instancianan mas y cada biaha ta resulta cu tin un necesidad grandi na informacion riba epilepsia.
E aña aki e celebracion di Purple Day lo tuma luga na e scol SPO na Santa Cruz unda e Directiva a prepara un bunita programa.
Minister di Enseñanza Sr. Rudy Lampe lo ta presente y lo tene un speech pa e studiantenan cu lo haya un treat di SEA den forma di juice y un cup cake cu capa biña cu ta color di e evento anual aki.
Durante e celebracion dialuna awor SEA lo entrega Minister Lampe un banchi (wrist band) cu ta indica cu e persona cu tin’e bisti, tin epilepsia cu por ta hopi importante den ora di emergencia. E sponsor di e proyecto aki ta SUBWAY ARUBA cu mas bes ta duna SEA un man den nan trabao cu ta wordo hopi aprecia.
