Awemainta a cuminsa tratamento di e ley cu ta regla e “coalitieheffing” pa financia e aumento di gasto di 125 miyon compara cu aña pasa.
Pa por compronde e motivacion di e serie di medidanan aki cu ta cambia un total di 13 ley, fraccion di AVP a hasi 235 pregunta al caso riba e topiconan manera eliminacion di reparatietoeslag, falta di compensacion pa esanan di mas vulnerable y empleadonan den sector publico, ampliacion di e base di BBO, como tambe e falta di conseho di organonan manera Banco Central y falta di consulta cu gremionan. “Gobierno a contesta 16 pregunta so,” Parlamentario Sr. Richard Arends a bisa. “Esaki ta un falta di respet pa e organo consitucional aki y coalicion ta usa Parlamento como instrumento di Gobierno”. Fraccion di AVP ta preocupa pa e efectonan di e ley aki riba nivel di prijsnan y costo di bida vooral si wak cu e ta un ley cu gobierno lo introduci ciegamente.
E ley aki no tabatin ningun bista y pronostico kico tabata e defectonan macro-economico p’e introduccion di e medidanan aki. Parlamentario Fraccion di AVP, Richard Arends, ta compara e situacion di awe cu aña 2007 – ora cu a introduci BBO – unda tin un aumento substancial di prijs di energia, un aumento substancial di prijs di gasolin, no tabata tin crecemento economico y Gobierno a opta pa introduci un medida acumulativo manera BBO y BAZV y tur hende por corda kico a sosode 1 aña despues: e tasa di inflacionnan a surpasa 10%. “E situacion di awendia tin tur caracteristica cu esaki lo porsosode un biaha mas.” Gabinete Mike Eman I y II a percura pa mehora e poder di compra di esunnan cu ta gana menos di 2500 florin: durante e periodo 2009-2013 esaki a aumenta cu 11%. Eliminando e reparatie toeslag casi pa 10 mil pensionado ta pone cu nos lo bay atras bek y lo duna un inicio na un deterioro social-economico.
Esaki ta algo di lamenta y Fraccion di AVP tampoco no ta compronde e ansha di gobierno mirando cu e medidanan aki lo mester drenta na vigor dia 1 juli 2018 y e compensacionan dia 1 januari 2019. A yega na nos conocemento cu dia 1 di juni vernidor lo bay tin un reunion di Conseho di Minister di Reino, unda probablemente nan a haci promesanan na gobierno Hulandes pa loke ta trata e entradanan. Parlamentario Arends no tin claridad riba esaki y p’esey Fraccion di AVP lo haci preguntanan riba esaki, pasobra ta nota cu Gobierno tin hopi pura pa introduci e ley aki.
Manera Parlamentario Arends, tin hopi politico nobo cu a drenta Parlamento. E la bisa enfaticamente di no kier forma parti di e tipo di “politica nobo” aki. Parlamentario Arends no ta kere cu ningun Parlamentario por a prepara nan mes bon pa motibo di e periodo cortico cu a wordo stipula. E ley di “coalitieheffig” ta cambia 13 ley existente. Parlamentarionan no tabata tin acceso debido na e banco di ley den fin di siman. Sinembargo dialuna Parlamentarionan mester tabatin nan preguntanan cla di cual finalmente un paar so a wordo contesta por escrito.
Fraccion di AVP kier hiba un politica nobo y p’esey nan a presenta un nota riba e cuadro financiero 2018 unda cu a base di datonan accesibel pa tur hende a hasi un comparacion entre e relisacion di aña pasa y presupuesto 2018. Fraccion di AVP lo pone esaki disponibel riba nan pagina di Facebook. Tur hende lo por mira e aumento di gasto di 125 miyon florin compara cu e realisacion di aña 2017 y tambe e 130 miyon florin cu lo ranca di pueblo.
Durante periodo di gobernacionan di AVP, a traha semper pa jumpstart nos economia, mehora poder di compra y clima di inversion, como tambe crea cuponan di trabow pa asina economia por crece y Gobierno por ricibi entrada. “Esaki lo no tabata diferente si AVP tabata den gobierno,” Parlamentario Arends a declara. “Te ainda e maneho economico ainda y ta wordo traha riba dje”.. Gobierno di AVP a haci esaki pa 8 aña largo y no a kere den un aumento di impuesto, pero a kere den un expansion di base y no ta mira esaki den e gobierno actual.
