Dialuna a habri trempan pa Minister Paul Croes, cu pa mas o menos 6:00am a ricibi bishita na su cas di un grupo grandi di Polisnan di Landsrecherche, cu a detene mesora. Mientrastanto a cuminsa un investigacion na su cas y aki a detene tambe un señora cu ta traha den e cas cu no por a mustra un permiso valido di estadia y trabou. Warda nos Costa a hiba e señora.
Tabata diahuebs dia 3 di augustus ultimo, cu den cuadro di e investigacion IBIS contra Minister Paul Croes, Ministerio Publico a confirma cu a prolonga detencion di E. “Giovanni” Capriles di 63 aña di edad, biba na Rontgenstraat # 10. E ta un di e Conseheronan di Minister Paul Croes, encarga cu su Relacionnan Publico y alabes ta Presidente di e Fundacion di campaña di e mandatario. Husticia ta acus’e di labamento di placa y complicidad di soborno. Despues di a detene dia 10 di juli ultimo, Hues Comisario a nenga su peticion di libertad, pero a cambio a prolonga su detencion cu 60 dia mas!
Husticia ta investigando specificamente tambe e fundacion di campaña di e Minister, esta Stichting Leadership and Excellence situa na Palm Beach # 51 lokaal 7 na Noord. Desde 18 di december 2014, Giovanni Capriles ta encabesa e fundacion.
Manera ta conoci, dia 28 di maart ultimo, Husticia a bishita un total di 13 diferente adres, incluyendo Bestuurskantoor, relaciona cu un investigacion cu a haya e nomber di Ibis. A detene algun hende den e caso aki, den cual Ministerio Publico ta acusa e mandatario personalmente di a tuma regalonan, promesanan y/of servicionan relaciona cu “ontheffing” di e “arbeidsmarkttoets” dor di cual stranheronan a haya oportunidad pa haya permiso di trabou.
Concretamente e acusacion contra Minister Paul Croes ta: “Ambtsmisbruik” y duna permisonan cu no tabata mag di traha na Aruba a base di nan “verblijfstitel”, oportunidad pa toch traha na Aruba. Tambe ta acus’e di labamento di placa di sobornonan ricibi. E sospecho di “ambtelijke corruptie” ta consisti di pidi/tuma soborno a cambio di “ontheffing van het arbeidsmarkttoets”. Despues di e “huiszoeking” na su cas, a acus’e tambe di “mensensmokkel” argumentando cu e tabatin un empleada illegal trahando den su cas.
“E ta deteni, esey so mi por confirma ainda”, asina Ann Angela, Vocero di Ministerio Publico a contesta nos awe mainta trempan ora a tuma contacto cune. Desde e “huiszoeking” na cas di e mandatario, a delibera cune riba su funcion, pero e no a tuma retiro. Conseho di Minister sinembargo a kita su encargonan for di dje y a pasa nan pa Minister Angel Bermudez. Ta despues di hopi aña, sino ta prome biaha, cu ta detene un Minister di pais Aruba, pa un acusacion penal.
