Fraccion di AVP a presenta diamars mainta tempran na gabinete di Gobernador, unda cu nan a bin atende cu algun asunto. Fuera di esaki tin un reunion den parlamento cu tin di haber cu e crisisheffing.
Marlon Sneek, lider di e fraccion, a splica cu nan a yega eynan, simplemente pa denuncia e abuso cu ta tumando luga. Diahuebs atardi ta manda un ley parlamento cu ta bay ranca 125 miyon florin for di saco di pueblo. Diabierna a laga sa cu ta dialuna mester entrega pregunta. Ora cu fraccion di AVP ta haci su trabao y ta manda tur su preguntanan aden, esta 235, ta contesta 16 di nan so. 219 pregunta no a wordo contesta. Riba dje ta yama un reunion pa diamars mainta 8’or. Ta parce cu ta un ansha di morto nan tin pa pasa e ley aki. Te ainda gobierno no por bisa kico ta e pura cu nan tin. Pero loke e fraccion ta kere cu ta pura, ta u nan tin cos di sconde. Nan tin miedo pa pueblo sa con nan a gaña nan. Entre otro e pensionadonan, gañanan cu lo bay baha den e caso aki nan prima di AZV caminda cu esaki no ta berdad.
Tambe esnan di un salario minimo, pa nan no haya sa cu gobierno ta bay hinca man den nan saco y saca riba 140 florin y gañanan cu 25 florin bek. Esnan cu ta cobra un onderstand cu no ta bay haya nada. E ambtenaarnan cu ta bay sufri bao di e redoblacion di BBO aki, cu lo causa sigur un inflacion di 10% y nan no ta haya un compensacion. E tipo di cosnan aki tin di sconde y ta di lamenta ora cu mira un fraccion di MEP, cu a pretende y sigur un gobernacion cu a bisa cu transparencia ta na prome luga, bon gobernacion ta na prome luga, e ser humano ta central. Y awe ta mira un fraccion manera di MEP ta bisa cu nan no tin ningun pregunta. Nan ta cla pa grita voor pa staca pueblo cu cuchiu, pa hinca man den saco di pueblo y saca 125 miyon. E cosnan aki mester ta denuncia. E cosnan aki tin cu trece nan dilanti.
E fraccion di AVP a bay combersa cu gobernador den su calidad di hefe di gobierno, pa bisa cu esaki no por sigui. No por sigui asina cu parlamento no ta haya su espacio real pa atende cu leynan y pa haci preguntanan cu tin cu haci, y mas cu tur cos, scucha gremionan.
Awe ta pasa un ley unda cu ta bay hinca man den saco di pueblo, sin cu a scucha ningun gremio. Ningun gremio, ningun sindicato, ni SER, un Raad van Advies pa e proceso ta entrega den e caso aki, su conseho, cual tambe a pone un banda. No a contesta Raad van Advies manera debe ser. Ta hendenan cu a yena nan boca cu mester respeta hoge college van State. Esaki ta un farsa y comedia cu gobierno ta bezig cun’e y tin cu denuncia esaki tur caminda cu por denuncia.
Mervin Wyatt-Ras, parlamentario den fraccion di AVP, tambe tabata tey hunto cu su coleganan Marloin Sneek, Richard Arends y Robert Candelaria. E ta comenta cu gobierno ta cometiendo un atraco riba nos hendenan. Costo di bida ta bira mas halto, prijsnan ta subi y asina por sigui menciona. Esaki lo ta un sla pa nos pueblo y aki gobierno ta mustra tambe cu nos tin un stempelparlement y no ta tene cuenta cu ningun tipo di conseho cu mester tin. Pesey tambe e comitiva a presenta na gobernador pa denuncia esaki.
Parlamentario Robert Candelaria a expresa cu un conclusion cu por yega na dje, ta cu gobierno no kier pa parlamento compronde e ley aki y no ta ni presenta e detayenan na parlamento y prome cu pueblo realisa, ta pasa esaki. Den e forma aki si no kier bay bek den pasado y keda ripiti, e ta sigur cu fraccion di coalicion lo opta pa vota voor.
