Segun Josette Daal di SKOA, Aruba tin mester di wak pa produci mas maestro di scol cu ta nos mesun hendenan den nos pais.
Mester brind’e e oportunidad, motiva hobennan pa scoge pa e trabao aki. Esey ta un di e cosnan cu lo mester wordo haci.
E diferencia di antes y awo
E diferencia ta sinta cu antes, tempo cu Daal mes a bira un docente, e tabata un yamada. Tempo ta cambia, segun Daal. Tempo cu Daal tabata hoben e ta bay pa e yamada, no ta bay wak kico e salario ta, of cuanto dia di vakantie bo tin. Awendia e ta cambia, pero mundo ta cambia tambe. E exigencianan tambe ta cambia. Pensamento di hende ta cambia. Hopi biaha e hoben ta wak otro cosnan, fuera di e yamada. Cu nan ta haya un yamada, si. Pero tin otro cosnan tambe ta hunga un rol. Ser maestro di scol no ta facil tampoco y awendia e ta bira hustamente mas dificil, pa motibo cu e muchanan di awendia ta exigi hopi mas atencion. Mayornan ta haya nan ta bay sali bay traha. Hopi mama ta haya nan ta bay traha pa por brinda nan yiunan tur locual cu nan tin mester. E cosnan ey tur ta hunga un rol. Tarea di un maestro di scol tambe ta cambia. E peso cu bo ta haya den scol e ora ey no ta di maestro di scol so. Hopi otro factor ta bin hunga un rol cu tabata tin den pasado tambe, pero awor aki e ta bira mas.
Por ehempel, tempo cu Daal a cuminsa, el a traha cu 35 mucha den klas. No por spera esey awendia, muchanan ta cambia. Nan ta exigi otro tipo di atencion. Nan ta exigi otro tipo di motivacion. E ta un reto pa un hoben scoge pa e trabao aki. Di un otro banda, e ta un trabao cu ta dunabo hopi satisfaccion, pasobra bo ta cuminsa un aña escolar y ora bo caba e aña cu tur mucha a pasa e aña of a slaag, esey ta e satisfaccion.
Si bo ta den un kleuterschool, b’a haya nan asina leu cu nan por drenta un eerste klas. Si bo ta den un eerste klas, den December caba bo tin un satisfaccion, pasobra ya nan por skirbi y lesa. E ta un reto, pero e ta duna un satisfaccion tambe. E satisfaccion ey ta personal. Cada ken mester sinti’e e ora ey.
