Un blogger Mericano cu a yega di subi un cantidad di sero a skirbi despues di a subi e sero di Montserate na Bogotá: “Be prepared, it is steep!”.
Asina mes tur dia hopi Bogotano y bishitante na e capital di Colombia, algun di nan hasta cu baby den stroller, ta purba haci un caminata riba e “Camino Peatonal”pa yega e top pa disfruta di e bista fantastico di aya riba. E bista ta fantastico di berdad. E top di Montserate ta keda 512 meter ariba di Bogotá cu ta na un nivel di 2,640. Pero pa yega aya ta duro. Pa duna un comparacion, Hooiberg tin trapi ta bay te na top y tur dia algun hende ta subi nan, pero e top ta apenas 165 meter halto. “Camino Peatonal” tambe ta un trapi, un trapi gigantesco 2365 meter largo y e ta subi tres bes mas halto cu Hooiberg. E blogger tin razon, e ta stijl! Pa hopi hende cu a caba di yega di Aruba na nivel di lama, Bogotá su haltura ya ta duna problema di respiracion. Pa subi e Camino Peatonal ta exigi mas di e pulmonnan; hopi mas si e persona ta purba jog bay t’e top. Mi amigo Willem Bant, un docente na Colegio Arubano, ta mantene su curpa den condicion cu un jog di mas o menos 5 a 7 km riba Linear Park tur dia y ta jog te na top di Seroe Cristal algun bes pa siman. Recientemente e mester a bay Bogotá pa asuntonan personal y el dicidi cu e ta bay subi e Camino Peatonal coriendo mescos cu e ta subi Seroe Cristal.
Willem a yega e top, pero no mes lihe cu el a pensa ya cu el a topa algun problema inespera. Como e dia ey tabata un diadomingo, tabatin masha hopi hende riba El Camino ta cana y riba bicicleta. Hopi comerciante ta habri tentnan chikito na cant’i caminda pa bende cuminda, refresco y souvenirnan, especialmente souvenirnan religioso. Hendenan ta para cumpra cos y stroba esnan cu kier yega na top. Tambe tabatin hendenan cu tabata subi eEl Camino pia abou pa penitencia. E monasterio di Montserate ta mahestuoso na top di e sero Riba un distancia di 2365 meter El Camino ta subi mas di 500 meter. Stijl! E bista di Bogotá fo’i top di Monserate ta fantastico. Willem Bant ta cuminsa su jog pa top di Montserate corriendo entre e hendenan cu ta keiro na El Camino E piso di e trapi ta di piedra riba tera. Hopi caminda e tera no ta pareu y asina hopi piedra ta sali mas cu otronan y pesey Willem mester a paga hopi atencion caminda e ta trapa pa no trompica. Mi amigo ta contento di a subi El Camino y e ta urgi tur cu bishita Bogotá pa subi’e tambe, pero no ta algo cu e lo pensa di haci atrobe. Pa Willem, e miho parti di e experiencia ta e treat cu el a haya despues di su señora Lieneke cu nan a disfruta cu un exalumno di Colegio: un plato di fruta cu icecream tipico di Bogotá cu tabata parce un obra di arte.
