E persecusion ta continua riba un of mas hefe di departamento cu ta cay bao di gobierno.
DTP (Departamento di Transporte Publico), no ta keda leu. Gerald Keteldijk ta director di e departamento aki y ta pasando den diferente problema pa motibo di e forma cu minister Chris Romero, of kisas su conseheronan ta manehando e departamento aki p’e.
Keteldijk a presenta na pia di trabao, pero nan kier dun’e un otro funcion, mientras cu tin un sentencia di hues riba mesa. Aki por mira un biaha mas cu un otro minister ta fayando y no ta respetando decision di hues.
Gerald Keteldijk a splica cu for di 14 di Februari, el a haya un carta, caminda cu e minister a notifik’e cu e ta ontzeg e entrada di e edificio di DTP. Pasobra e lo kier a haci un investigacion profundo di e departamento.
Esey tabata pa un periodo di seis siman cu eventualmente e por wordo extendi cu seis siman mas.
E seis simannan aki tabata un smokescreen y Keteldijk a asumi cu e lo ta 12 siman. Como tal tambe el a sosode. For di Februari te cu Mei, e tabata na cas. Mientras tanto el a delibera cu su abogado, a pensa kico ta bay pasa despues di Mei. Despues di esaki a bin un otro carta. Un carta caminda cu minister ta leg’e op, a base di articulo 52 lid 1 di LMA, pa obliga Keteldijk asumi un otro funcion. Den e caso aki e funcion di beleidsmedewerker. Keteldijk no a bay di acuerdo. No por ta bezig cu un investigacion, no a presenta nada, ningun resultado di e investigacion y awor aki diripiente ta schuif e director. A bay corte pa esaki. Na corte hues a dicta na fabor di minister Romero pa sorpresa cu e tabata pa Keteldijk, pero asina e ta, cu e por leg’e op e otro funcion a base di e articulo ya menciona.
Keteldijk no a haya cu ta problema y tin cu cumpli cu e sentencia. Pero e sentencia tabata bisa, segun e carta mes di Romero, pa un periodo di 12 siman y cu a cuminsa core dia 9 di Mei. Dia 9 di Mei, contanto 12 siman, ta caba dia 9 di Augustus. Mirando cu e tabata tin algun dia malo, el a plak aan e ziek, e ora awe, 15 di Augustus, a presenta na pia di trabao.
Keteldijk a presenta pa traha como director, pasobra e periodo di 12 siman a pasa. Awor cu e ta yega, el a tende un otro storia, cu e minister kier toch pa e traha como beleidsmederwerker. E decision ey, el a caba di hay’e verbalmente for di e manager di e management team y contest’e cu e no ta bay di acuerdo cu esaki. E ta director ainda di DTP y e no ta kere, e no ta mira pakico e tin cu bay traha bao di un management team y den un funcion di beleidsmedewerker. Eynan nan ta awor aki.
A bolbe haya un noticia for di sr. Thiel cu bureau di minister ta mandando un tal Anwar Lacle pa bin na oficina di DTP, pa combersa cun’e.
Carta
E intension ta pa warda un carta di minister. Tin tambe cu decisionnan asina aki verbalmente. Segun Keteldijk, di su banda, e no ta acepta esaki. Si kier impone cu e tin cu keda traha como beleidsmedewerker, e ora ey tin cu pone preto riba blanco. E di, e ta sinta warda riba e carta. Pero aparentemente un carta no a bin. Na momento cu Anwar Lacle yega di e oficina di minister e lo sa kico ta kico.
Deseo
Keteldijk a comenta cu e tin cu lucha. E tin 35 aña di dienst. E tin 60 aña di edad. E falta 3 aña pa e bay cu su pensioen. E no por entrega esaki zomaar pa perde. Perde pakico, el a comenta. E no a haci nada. Pakico e tin cu perde. E tin cu lucha pa motibo di su posicion pa salvaguardia su pensioen. E no tin otro opcion. Esey ta loke ta pasando. E no kier bringa cu ningun hende. E no ta den un conflicto cu minister, gobierno, etc. E kier simplemente pa nan respeta ley. Y ley ta cu e ta director na DTP y e kier traha. Ambtenaar e ta. E ta traha cu cualkier gobierno. No ta importa ki color. Pakico ta strob’e di traha. Awor aki e no ta compronde.
Un otro tipo di trato
Keteldijk ta sinti cu e no por mira otro cu ta persecusion esaki ta. Na 2001, na KIA, tambe el a wordo persigui. E tempo ey tabata bao di minister di husticia. Esaki ta como si fuera cu esaki ta bay continua. E no por duna nan e gusto aki. Keteldijk lo lucha te final, pasobra cu e sa cu na final di dia, lo e vence. E cos aki ta inhumano. Pa bo ta persigui un trahado di e forma aki, e ta inhumano. Finalmente durante dia prome cu merdia el a haya un carta unda ta notifica Gerald Keteldijk cu awor e ta geschors.
