Por a tende hopi hende bisa cu ta wardando nan permiso, pa haya contesta, pero aparentemente tin hende tambe, mas cu 1000, 2000 kisas, cu no a presenta pa busca nan permiso. mr. Kathy Ruiz-Paskel, director di DIMAS a splica na e momentonan aki a haci dos proceso di accion di entrega. E prome accion cu a haci ta pa invita e hendenan pa bin riba un diabierna, acudi, unda cu a pone full un team pa entrega nan e permisonan of e desicionnan cu tabata cla.
Sea cu ta un carta, un engacion of un permiso. Esaki a duna su frutonan, pero den e siman, e hendenan a sigui bin busca nan permiso, pero a keda toch cu un cantidad considerabel y a pensa di haci un di dos plan di accion. Esaki ainda nan ta den dje. A cuminsa manda desde e siman aki diferente permiso di cual e hendenan no a pasa busca y tabata cla. A cuminsa manda nan por medio di post sigura. Loke ta nifica cu e hende aki lo haya siguientemente un notificacion roos den su postbus, cu e por acudi na postkantoor y pasa recoge su documento.
Den esaki tin dos variacion. Tin e variacion unda cu a manda e permiso conhuntamente cu e carnet y tin e variacion unda cu a entrega solamente e permiso riba papel.
Pakico
A constata cu den e casonan ey ainda e persona su firma no tabata registra digitalmente den e sistema. E persona aki cu haya su permiso riba papel so, por acudi na DIMAS ainda riba un dia di trabao, pa pasa recoge su carchi. Prome cu esey e lo mester firma digitalmente den e sistema. Alomenos e tin un papel den su man cu por mustra cu e tin un permiso valido.
Esey ta canando y lo sigui cana den e resto di e siman aki di igual manera. Ta spera cu e dos accionnan aki por reduci e cantidad cu tur hende a haya nan contesta riba nan peticion debidamente. A keda pidi clientenan cu tin un peticion den tramite na DIMAS, pa subi riba nan website cu ta www.dimasaruba.aw. Haci uzo di e tracking tool, hinca e number di cliente y check si tin algo cla pabo. Diariamente ta update e lista aki. Hendenan cu busca, e ta kita for di e lista y si tin hende nobo cu tin algo cla pa nan, e lista ey lo wordo bijgewerkt, e ora bo sa e ora cu tin algo cla pabo.
Ta den e fase cu DIMAS mes ta comunicando cu e clientenan via postkantoor. E intencion no ta cu lo keda haci esaki pa futuro. Ta p’esey mes a bay over na un sistema digital. Pronto lo kier tambe comunica cu e parti cu e cliente mester tin un email priva, personal di dje. Ta bira obligatorio pa asina por comunica na momentonan cu tin cosnan cla p’e of hasta manda cierto cartanan, etc. Esey no ta e caso awo. A mira cu for di September pa awo, hopi di e peticionnan cu a entrega, e email no tabata inclui, cu ta haci e ora e comunicacion via email uno mas dificil y mester a recuri na e comunicacion tradicional, cual ta manda carta, den e caso aki, manda e permisonan via post sigura.
