E miembro di Tweede Kamer Andre Bosman a haci un serie di pregunta na Secretario di Estado di Asuntonan Interno y Relacionnan di Reino riba e asunto di “opvang” di Venezolanonan na Aruba y Corsou y e supuesto ayudo di Hulanda den esaki.
Prome e kier sa si Secretario di Estado ta na altura di e publicacion cu Gobierno ta pidi Hulanda asistencia pa refugio di Venezolanonan. E tabata kier sa si e Gobiernonan di Corsou y Aruba ya caba a pidi caba pa apoyo financiero y operacional pa e refugio di e grupo aki. Pero tambe e kier sa si e mandatario ta comparti e opinion cu e apoyo no por tuma luga si paisnan manera Aruba na mesun momento ta atrae inmigrantenan mirando declaracionnan di Gobierno cu nan lo “ricibi refugiadonan tolerante y hospitalario”, manera a wordo haci door di Prome Minister di Aruba Mike Eman den pasado.
E kier sa con Secretario di Estado ta interpreta e yamada di Alto Comisario di Nacionnan Uni pa Refugiadonan pa duna e migrantenan Venezolano e status di refugiado? Ta aplicabel tambe pa Aruba y Corsou cu mester haci un evaluacion si un persona ta un refugiado si of no?
Otro pregunta ta si e Secretario di Estado ta familiarisa cu e anuncio di Minister di Comercio Exterior y Cooperacion pa Desaroyo di dia 27 di februari, 2018 haci cu Ministerio di Husticia y Siguridad den colaboracion cu Boneiro, e organisacionnan ehecutor (manera Marechaussee Real, Cuerpo Policial Caribe Hulandes y Servicio di Inmigracion y Naturalisacion di Caribe Hulandes) y Defensa di un plan di emergencia cu a wordo crea pa un eventual escenario cu e cantidad di migrantenan sigui aumenta. E kier sa si e por describi ki consecuencianan e entrada na vigor di e plan di emergencia aki por tin pa Hulanda.
Despues ta bini pregunta cu a wordo haci diferente ocasion. E ta desea di sa si tin informacion riba e cantidad di Venezolanonan cu mientrastanto tin na Aruba, Corsou y Boneiro. Si ainda no ta mucho cla cuanto Venezolano tin den e parti Caribense di Reino. Si t’asina, si por lo menos por ilustra kico ta e cifranan oficial y con esakinan ta en comparación cu e calculacionnan haci di Gobernantenan di e islanan?
Con ta relaciona declaracion di e Gabinete cu e hecho cu den 2017 a registra 16 peticion di asilo di Venezolanonan na Aruba cu e expresion di politiconan di Aruba cu ta bisa cu miles di refugiadonan ta keiro riba e isla.
Con e Secretario di Estado ta califica e declaracion di e Prome Minister di Corsou cu e asunto di e Venezolanonan ta un asunto di Reino, particularmente den luz di e decision di e anterior Minister di Interior y Relacionnan di Reino cu admision di ciudadanonan stranhero ta un asunto di e pais y cu e paisnan ta dicidi riba admision admision y e proceso di entrada y salida di nan.
Den pregunta no. 8 e kier sa si e Secretario di Estado ta conoci cu e informe “Aruba no tin espacio pa ricibi refugiadonan”. Si ta cuadra cu Aruba ainda no a caba di regla e situacion pa ricibi refugiadonan, apdesar di e hecho cu Gobierno mes a bisa cu desde 2006 nan ta atendiendo cu e tema aki” Bo ta comparti e impresion cu e falta di un localidad no tin di haber cu e apoyo financiero sino cu lentitud den tuma decision y falta di boluntad politico. Den mesun rosea e ta puntra con e situacion ta na Corsou riba e mesun punto aki
Pa finalisa e kier sa cual pasonan e Secretario di Estado ta tuma pa evita cu Venezolanonan na Aruba y Corsou ta sigui biaha pa Hulanda.
