Parlamentario Benny Sevinger a bishita varios di e kiosconan cu tin na Welcome Plaza. E tabata hunto cu parlamentario Arthur Dowers. Nan a bishita e kioskeronan cu diferente preocupacion. Hopi di nan a haya carta for di minister bisando cu e ta bay kibra nan contracto. Pero tin ley. Pa kibra un contract, bo tin cu bay hues. No por djis manda un carta bisa cu ta kibra contracto di e hendenan. A papia cu diferente di nan cu ta buscando nan caminda legal, cual e minister no tin pia pa para ariba. E proyecto aki no ta un proyecto cu a start awe, sino 8 aña pasa, ora cu a trece pa renoba Aruba completo. E mes a para eynan.
Sa cu no ta un proyecto di awe cu ta bisa cu ta kita e kioskeronan cu a haya un derecho di gana un pan, pasobra abo tin un otro grupo pa duna. Diamars den reunion di parlamento, e minister a bisa cu e kier duna e hendenan di cosecha. Tempo cu Minister Hooyboer tabata minister di cultura, a drecha un monumento patras di bestuurskantoor, un monumento di 100 aña, pa cosecha. Tur e artesanonan local, a traha, drecha un edificio pa nan. Tempo cu e a bira minister, a pase over, hasta a haci un fiesta eynan, pa e hendenan por haci uzo di cosecha. Despues cu el a bira minister, el a cambia di idea y a bisa cu tur e artistanan local mester bay San Nicolas. Awo bo kier scucha e escusa pa bo kita e kioskeronan cu a haya nan kiosco eynan, cu tur derecho, cu contract, un lopende zaak, ocho aña. Segun Sevinger, hues lo bay tik’e riba su dede, pasobra e ta pick and choose. Uno bo ta manda carta y e otro no. E minister aki no tin pia pa para riba dje. Loke tin cu haci ta, e siguiente pasonan cu tin cu wordo duna eynan. Un di nan ta promocion, unda cu e tram tin cu pasa. Tin cu pone borchi pa e turistanan sa cu eynan tin e mercado di Aruba oficial, tin un otro mas p’ariba. Pone borchi pa sa cu tin un fleamarket. Pone bandera pa e turistanan sa. Promocion di e area aki, a laga p’e haci. Ta spera cu e haci’e.
E deliberacion cu APA pa habri e gate, caminda cu turistanan ta sali directo riba e plaza aki, tambe ta un trabao p’e haci.
A laga tekening, haci destaho pa por pone sombra pa e hendenan, tambe e tin cu haci.
A bisa tambe cu mester bin un reevaluacion di esnan cu ta traha eynan, pa na por pone algun articulo p’afo di e kiosconan. Na cada muraya, por traha un mesa, unda cu durante dia, e ta habri cu nan por pone nan articulonan pafo y durante anochi nan ta cer’e bek, basta cu no stroba pasada. Si haci’e uniforme, cu DOW ta haci’e y pone tur, no lo bay tin problema cu uno ta pone mesa grandi y e otro chikito. Ta cosnan cu mester por haci como minister.
Pa prome cos pa kita pan di e hendenan, ta di mala fe bo ta. Bo no a bin pa traha, bo no a bin pa caba proyecto. Ta cuater cos cu Sevinger a laga atras pa e haci y e no ta sinta na mesa pa haci esey.
Ban sinta na mesa con pa persigui hende, pasobra si el a hay’e for di gobierno anterior, ta di AVP e ta. Esey ta e mentalidad di minister Otmar Oduber. Con bo por a bira asina, pa Sevinger ta increibel. Un biaha mas, ta ami tin cu biba y wak con e resto ta biba y ken cu persigui, ta persigui. Ta lastima con un persona por a bira asina eynan. E hendenan aki tin derecho. Ta un lopende zaak di 8 aña. Oduber no a traha nada pa duna ningun hende. Ta gobierno anterior a traha un beyesa di proyecto y no ta na su luga cu ta prome cos cu ta haci dos dia despues cu a drenta como minister, pa persigui e hendenan. Tin ta struggle pa biba. Tin biaha ta $20 nan por gana pa dia. En bes di yuda, ta kita pan for di nan. Esey ta loke cu Sevinger ta lamenta. Si mester bay corte ta bay corte. Loke e minister aki ta haci, ta di mala fe. Bo no por ta drumi bon ora bo ta kita pan di hende asina ey, manera cu bo a haci’e na e forma descabeya aki.
