Ling & Sons den temporada di december 2020 tabatin un campaña di un aña di compra y e ganadonan di esaki ta Yhoely Willems y Fundacion pa nos Muchanan. Diferente persona a participa na esaki. Tabatin diferente participante, pero un ganado a bay cu mas di 500 di florin pa luna na compras.
Sharlin Maduro a representa Casa Cuna y el a expresa cu esaki tabata algo leuk, pero ta contento p’esun cu a gana y mas cu claro nan tambe a bay cu algo chikito p’e fundacion. Pa haci esaki tabata algo bon, pasobra aworaki e situacion ta dificil y cosnan aki ta yuda un instancia. Gloria Maduro, representante di Casa Cuna, ta gradici Reina Koolman kende a scoge nan como fundacion p’e Shopping Spree. E fundacion di Casa Cuna ta contento di esaki, pasobra cada tiki cos asina aki ta yuda e fundacionnan.
Yhoely Willems a representa Fundacion pa nos Muchanan y tabata e ganado absoluto di e campaña aki. Pa su persona esaki tabata prome biaha cu el a haci compras den dos minuut, pero aunke el a keda cansa, esaki tabatin su fruto. Nan a mira prome kico ta e productonan cu Ling & Sons tin, di eynan a enfoca riba e cosnan chikito cu tin mas balor. Nan meta tabata pa bira e ganado y a logra esey.
Fundacion pa nos Muchanan ta gradicido tanto na Yhoely Willems y Ling & Sons pa ta parti di e campaña aki. Un di e metanan ta pa yuda e centronan di Traimerdia, pasobra aña pasa door di e COVID nan mester a cera porta ya cu no por a ofrece cuido na muchanan. Esey a pone cu no tabatin entrada, aunke hopi di nan ainda ta experencia dificultad financiero. Segun e representante di Fundacion pa nos Muchanan, tur luna nan kier scoge dos centro y duna nan gift certificate di Ling & Sons pa yuda nan. Nan ta bay parti e suma di placa na 250-250 florin pa yuda 24 centro.
