Ta nos responsabilidad como mayor, como comunidad, como adulto pa zorg pa nos hobennan tin caminda di bay y cu tin suficiente actividad pa asina nan por desaroya nan mes fisicamente y sicologicamente. Sinembargo costo di bida a bira asina halto cu mayoria biaha e mayornan mester traha ora nan largo, loke no ta permiti nan pa tin suficiente tempo pa dedica diariamente na nan yiu y tin cu hasta mester traha dos trabou of mas. Guia pafo di cas a bira un negoshi asina lucrativo cu hopi mayor dibaina por paga pa esaki.
Ami como mama ta pasa den esaki y pa es motibo mi a dicidi pa forma parti di partido UPP pa huntu nos por logra di yega na un maneho special pa hubentud y nan desaroyo humano.
Parti di nos maneho special pa hubentud ta pa amplia servicio di e centronan di bario pa asina nos hoben nan por hasi mas actividad manera arte, canto, baile, deporte y mas na un costo mas rasonabel. Nos kier promove actividadnan voluntario den comunidad pa asina nos por stimula e amor y aprecio pa comunidad. Pa medio di esaki nos ta promove y garantisa bienestar fisico y sicologico futuro y na mes momento duna sosten real na expresion cultural, creativo, artistico y intelectual den nos comunidad pa asina nos crea hobennan madura, y asina bira adultonan stabil cu lo guia Aruba.
Pa medio di nos plan di maneho special pa hubentud nos kier ofrece diferente incentivo pa asina mas compania emplea nos hoben nan recien gradua, forma parti di nos leerwerktraject unda lo por studia cierto oranan stipula pa dia of siman y traha como part timer of intern pa e sobra di orario y duna mas sosten na esnan cu ta prefera di studia beroepsgericht.
UPP por logra esaki y hopi mas cu e apoyo, sosten, voto y confianza di e pueblo di Aruba.
