Diaranzon tur hende a haya sa e secuencia y color di e partidonan politico. A tuma luga un reunion publico pa asina determina esey. Tin 8 lista riba e stembiljet pa dia 22 di September, dia di eleccion. Tur partido sa kico ta nan color y tur partido sa tambe kico ta nan number riba e lista aki.
Sharin Luydens, directora di Censo, a splica mas di e reunion publico, caminda cu Conseho Electoral a tene, por ta e ultimo reunion prome cu eleccion, dia 22 di September. El a comenta cu ley ta determina den articulo 30, cu awe, dia 30 di Augustus, a asigna e secuencia riba e stembiljet y tambe e color. Esey ta loke a sosode.
Proceso
Luydens a splica cu lot ta determina. Tin ocho partido. Ta pone ocho number den un envelop y cada un representante di e partidonan a hinca nan man den e envelop y a coy un number.
E proceso a bay bon, segun Luydens. Ta un proceso normal, cual el a bin ta haci ya pa 3 biaha caba. E ta un proceso habri y tur hende por a wak kico ta bay haci, kico a haci. A sigui pa asignacion di e colornan. Si a bay eleccion anterior cu un color y si pidi e color eynan, t’abo como partido ta hay’e. Abo tin e preferencia riba dje. Pesey mes a asigna AVP cu berde, pasobra esey el a pidi y a bay eleccion pasa cu berde. MEP a haya geel. Eleccion pasa el a bay cu geel y tambe otro partido manera Curpa y Red, cual no tabata tin ningun otro partido cu a pidi e color cu nan tin, cual ta biña scur y blanco. E otro partidonan cu si a pidi e mesun color, esta PPA/UPP cu Raiz, ambos a pidi kaki, POR y MAS, ambos a pidi blauw scur. A bay un envelop apart, caminda cu nan tambe a coy e color of un papel blanco. Esey por a sak’e for di envelop y e ora a resulta cu POR a haya blauw scur y PPA/UPP a haya kaki.
Numeracion y color
Raiz a saca number 1 y e color cu a wordo asigna na dje ta color shinishi.
PPA/UPP a saca number 2 y e color ta kaki riba e stembiljet.
MEP a saca lista number 3 y lo bay cu geel.
Curpa a saca 4, y e color ta biña scur.
POR a saca 5, cu color blauw scur.
MAS a saca 6, cu blauw cla.
Lista number 7 ta RED, cual ta blanco.
Lista number 8 ta AVP, cual ta berde.
Blauwnan tras di otro
E blauwnan ta tras di otro, pero no ta trece confusion. Nan lo haci tal manera cu por mira e diferencia bon cla riba e stembiljet cu tin un diferencia di color.
