William Marlin, Parlamentario di Sint Maarten (National Alliance), tambe tabatin palabranan fuerte contra Hulanda, igual cu su colega di Aruba Edgard Vrolijk. “Hulanda ta e pais mas corupto di mundo,” ta loke el a bisa na final di e reunion entre e islanan CAS (Corsou, Aruba y Sint Maarten).
Marlin a presidi e reunionnan durante e tripartiet como cu e ta encabesa e comision parlamentario di Sint Maarten pa Relacionnan den Reino.
E reunion na Sint Maarten a tuma luga durante un dia so y a trata temanan cu ta regarda e islanan y tambe temanan relaciona cu IPKO (reunion entre parlamentonan di Reino Hulandes.)
Ora cu el a papia di e situacion di Sint Maarten y loke ta papia di e isla, el a bisa cu “storia di corupcion, a wordo indoctrina door di Hulanda riba nos. Y nos hendenan ta hopi lihe pa condena su mesun hendenan. Hulanda ta e pais mas corupto den Europa. No pasobra ami ta bisa esey. Estadisticamente esaki ta proba,” Marlin a bisa,. Y a agrega cu simplemente mester google y e pruebanan t’ey.
E politico a bisa cu simplemente mester haci un analisis di e casonan di corupcion cu tabatin na e islanan Hulandes, y por mira cu tur tin un relacion, of influencia Hulandes. Den su mayoria tabata practicanan di corupcion den cual companianan Hulandes ta envolvi.
Siguiendo riba e tema, el a bisa cu corupcion bo ta haya tur caminda di mundo. “Pero mi no ta uza esaki como un excuus pa hustifica un hecho coruptivo. Pero si mi por bisa cu mayoria di politico na e islanan Hulandes no ta corupto. Mayoria di nos hendenan no ta corupto. Pero nan (Hulanda) ta uza esey ta sconde nan intencionnan, pa acusa nos hendenan di corupcion, pa bay den union cu nan en bes cu nos ta lanta hunto como un pueblo.”
Na momento cu nos hendenan realisa e necesidad pa e islanan aki ta paisnan independiente, e ora por forma bon aliansanan, pa yega na acuerdonan di cooperacion cu ta beneficia e pueblonan. P’esey despues di horcan Irma mester a acudi na Hulanda pa ayudo y no na Nacionnan Uni manera otro islanan den Caribe a haci,” el a duna di conoce.
William Marlin ta un politico di Sint Maarten kende a ocupa e puesto como e di tres prome minister di Sint Maarten for di 2015 pa 2017. Marlin tabata lider di National Alliance, y tabata lider di e prome y di dos Gabinete Marlin.
