Duna Luz tambe ta festehando e siman di dunamento di pecho. Rushlenda Martijn, partera na Duna Luz, a splica cu lechi di pecho ta e miho tipo di lechi pa cada baby. Tambe babynan cu ta nace prematuro, ainda lechi di pecho ta keda e miho lechi pa nan.
World Health Organization y UNICEF ta recomenta pa tur baby haya 6 luna lechi di pecho so. Nan no mester haya awa extra, nan no mester haya sopi di yuwana, ni un boter di orange juice. Pa e welanan cu ta stimula esaki, no haci esey. Pasobra e baby no mester di dje. Ta purba pa tur baby haya seis luna di lechi di pecho exclusivo y despues di esey tambe pa nan por continua cu haya lechi di pecho, e ora ey den combinacion cu otro alimentonan pa por lo menos e prome dos aña of te ora cu e baby indica su mes cu e no kier mas.
Beneficio di lechi di pecho
Pa e baby e beneficio primordial ta cu e lechi di pecho ta e miho nutricion, pasobra e ta perfectamente balansa pa e curpa di e baby. Esey ta nifica cu e lo cambia di smaak, e lo cambia di consistencia, e lo cambia di cantidad, a lo largo cu e baby ta crece, pa por satisface e necesidadnan di e baby.
Fuera di esey e lechi di pecho tin asina hopi antistoffen, cu e ta proteha e baby. Tin cu wak cu lechi di pecho como si fuera e ta un vacuna di e baby, na e momento cu den vecindario of e mama tin un malesa, e por pasa e antistoffen pa e baby, protehando e baby pa cierto infeccionnan.
Estudionan a mustra cu lechi di pecho ta preveni alergia, e ta preveni excema, e ta preveni problemanan di e maagdarmkanaal. Tambe babynan cu ta haya baby di pecho tin menos sobrepeso y menos diabetes. Ta algun di e malesanan cu ta wordo preveni ora cu bo ta duna pecho.
Babynan cu ta haya lechi di pecho ta mas inteligente. Lechi di pecho ta stimula desaroyo di e celebro di tal manera cu lechi di bleki no por, cu ta haci cu un averahe cu un mucha haya su lechi di pecho, si IQ ta 10 biaha mas halto, compara cu muchanan cu ta haya lechi di formula. Ta algun di e beneficionan pa e baby.
Beneficionan pa e mama
Mamanan cu ta duna lechi di pecho, tin menos chens pa haya anemia, mirando cu ora cu nan ta dunando lechi di pecho, e matris lo contrae mas, haciendo cu nan lo perde menos sanger despues di parti y e simannan cu ta sigui. Si nan ta perde menos sanger, nan tin menos chens di desaroya anemia. Fuera di esey e matris lo haya su size normal mas lihe. Pa mamanan cu ta duna lechi di pecho pa un temporada largo, ta preveni pa haya cancernan manera cancer di pecho, cancer di ovario, cancer di matris, tur esakinan ta wordo reduci pa mamanan cu ta duna lechi di pecho. Loke ta un plus punt pa cada mama ta yuda cu bahamento di peso, mirando cu cada biaha cu duna lechi di peso, e curpa ta uza mas of menos 500 pa 550 caloria. Por compar’e cu un living lyposuction machine den bo curpa cu cada dia ta uza mas energia.
Beneficionan pa comunidad
Tin beneficionan pa comunidad. Tin cu pensa cu mirando cu babynan ta bira menos malo ora cu nan ta haya lechi di pecho, e mama lo ta menos ausente di su trabao, pasobra e tin menos bishita na dokter. E ora e gastonan pa comunidad ta menos. E beneficionan di dunamento di lechi di pecho ta grandi. Pero pa por logra haci esaki exitosamente, kier stimula mamanan pa haci uzo di e oportunidad di e prome ora despues cu e baby caba di nace (Golden Hour).
Pakico e ora aki ta importante
Den e ora aki e baby ta mas alerta. Lo yega un momento tambe cu e baby mes ta cuminsa busca. E ta cuminsa hinca su man den su boca, e ta cuminsa chupa y lo ta ideal si den e momento ey e baby por haya e oportunidad pa por bebe na pecho y haci esaki trankil pa por lo menos 15 pa 20 minuut cada banda. Esaki lo haci e ora ey e prolactina gehalte di e mama ta wordo stimula, e ora e produccion di e lechi ta wordo stimula.
Den un articulo cu a sali ta mustra cu rond mustra cu 2 di cada 5 baby so ta haya e oportunidad di wordo pega na pecho den e prome ora. Esey kiermen cu tres di cada 5 baby no ta haya e oportunidad aki y cu nan ta core e ora mas riesgo di haya infeccion of cierto malesanan cu te hasta por den cierto casonan, yega na morto di e baby. Pesey e prome ora ta sumamente importante. E grupo di partera, ginecologo, zusternan na hospital, ta haci todo por todo pa den e prome ora e baby haya e prome oportunidad. Pero ta keda na e mayornan por haci esaki posibel. E potretnan por warda, bishitanan por warda, pero haci uzo di e bond cu e baby den e prome ora ey y dunando e ora loke e merece, cual ta e miho lechi, cual ta lechi di pecho.
