Karel Wever a lanta WEMA 36 aña pasa. Nan tabata un compania cu solamente tabata bende tools, hardware, bolts, nuts y verf. Awendia WEMA a amplia nan stock y adicional a cuminsa bende esta airco inverters. Tambe a introduci pa clientenan un carchi di miembresia y tur siman tin articulonan riba descuento den e Special di Siman. E sigiente stap di WEMA ta pa cera partnership cu diferente socionan strategico riba e isla, pa asina por bay inverti den un luga nobo, y tambe den nan empleadonan. E partnership nan aki ta brinda ambos partido un win-win situation.
Karel Wever, awo retira y disfrutando di su pensioen, a splica cu e ta masha contento cu nan a cuminsa traha hunto cu Aruba Industrial Services (AIS), unda cu por huur tur aparatonan pisa. “Nan ta gana, WEMA ta gana y Aruba ta bay dilanti y clientenan di WEMA ta bay dilanti!” ela bisa.
Necesidad
Wever a sigui splica cu WEMA a pasa den su ups and downs. Awor aki ta subiendo bek unda cu nan tabata y mas duro cu nunca. Ariba peticion di clientenan di WEMA cu por ejempel tabata interesa den huur un diversidad mas grandi di aparato y cu tabata interesa den financiamento, a dicidi di aserca y cera partnership strategico, no cu un, pero cu varios compania local. Asina WEMA kier brinda su clientenan e servicio nan aki.
E sigiente partnership cu WEMA ta orguyoso di dje ta e partnership cu Total Finance. Por ehempel si bo ta interesa den cumpra e airco inverter of den powertools, bo por aplica den WEMA mes pa un financiamento di Total Finance. Karel Wever ta conta: “Si mira bon, WEMA ta un compania cu a bira dinamico. Antes nos tabata sinta warda cliente bin cerca nos. Awor aki nos ta buscando socionan strategico y nos ta bay cerca e cliente. Ta un cambio total tin. WEMA tey y mas duro cu nunca. WEMA a bin pa keda!”
Awor aki Karel Wever ta forma parti di e Hunta di Comisario di WEMA cu ta consisti di tres persona, kendenan ta Joe Maduro, Ryan Kock y Karel Wever mes. Nan tres, hunto cu e management team di WEMA, ta traha duro pa trese e cambionan aki.
AIS
Mitchel de Jong ta director di Aruba Industrial Services (AIS). E ta conta cu semper tabata tin e plan pa bin mas den e parti nort di Aruba y cu WEMA nan a encontra e miho partner pa hasi esaki. AIS tin e mesun tipo di cliente y sa exactamente kico nan ta busca. Awo cu nan tin un punto di benta na Aruba mes, de Jong ta kere cu esaki lo bay bira hopi exitoso.
E mashinnan
Den e edificio di WEMA na Ponton, AIS lo pone e ekiponan mas chikito. Esakinan ta entre otro Mini Escavators, Sciccorlifts, Generators, Forklifts y Steer Loaders. Tambe nan lo ofrece ekiponan mas grandi, manera e Escavators grandinan y e Wheelloaders grandi pero esaki lo wordo entrega a peticion di e cliente. E mashinnan cu lo bay tin na e edificio di WEMA Ponton ta ekiponan mas chikito y cu ta mas facil pa por maneha. De Jong ta bisa: “E ta bay bira hopi facil mes pa e clientenan. E ekiponan mas chiquito lo keda na WEMA mes. Asina ta mas facil pa bo jega, huur bo ekipo y bai cune.”
Garantia di AIS
AIS ta un compania cu ta conoci pa su excelente servicio. Segun de Jong, nan tin nan propio garage y ta service tur e ekiponan na tempo. Tur ta up to date. Asina ta cu no ta bai tin ningun problema technico cu ningun mashin.
Gerencia di WEMA
Sr. Hooplot ta e Managing Director di WEMA, kende ta conta cu nan a firma un acuerdo di cooperacion entre AIS y WEMA, unda ambos compania ta hopi contento y entusiasma. Ta e dia perfecto pa por brinda nan clientenan miho. Tin hopi contratista cu ta cliente di WEMA y sigur nan kier huur ekipo. Awo nan por amplia e servicio y WEMA naturalmente ta hopi entusiasma cu e hecho aki.
Un servicio full house
Segun e gerente, e clientenan ya ta bin WEMA y e contratistanan na luga di bay Barcadera pa huur mashin, nan ta djis bay WEMA y huur esakinan. Nan tin algun mashin mas chikito, pero tur cos cu AIS tin, por huur na WEMA. E ta mas facil pa e cliente. Nan ta haya e mesun servicio di AIS, nan ta propiedad di AIS y e servicio duna, ta di WEMA. E partnership ta trece un producto mas completo na e cliente, specialmente den e parti aki di isla. E ora no mester bay te Barcadera.
Servicionan otro caminda
Awor aki nan ta na Ponton, pero na momento cu tur cos bay di acuerdo cu e plan y ta contento, e ora lo bay haci e mesun cos cu San Nicolas. Clientenan di San Nicolas, tin e mesun necesidadnan. Nan mester di e mesun mashin y servicionan. E di tres luga, e tienda na Santa Cruz, ta hopi cerca cu Barcadera. Pa awo e no lo bay ta eynan. E lo bay ta solamente na Ponton y San Nicolas.
Rekerimento pa huur
Pa bo por huur un mashin bo mester por maneha un mashin y bo mester di un rijbewijs, e ora tur cos lo ta bon. Tur servicio lo ta mescos cu bo lo bay huur na AIS. Mas chikito e mashin ta, ta mas facil pa huur, pero lo bo mester di un deposito. E mashinnan mas grandi tambe, posiblemente lo tin mester di un chauffeur.
Orario
WEMA ta habri 7 dia pa siman, di dialuna pa diadomingo, for di 7’or di mainta pa 7’or di anochi y diadomingo di 9’or pa 1’or di merdia. Bo tin henter un dia cu bo por yega pa servicio y hasta riba diadomingo. Si bo mester di un mashin riba diadomingo, yega WEMA y nan lo brindabo e servicio cu bo tin mester.
Pa mas informacion por bishita www.wemaaruba.com
