Pa 1:51pm Aruba a experencia un otro black-out total y e pregunta cu hopi tabatin ki ora coriente tabata bin bek. E black-out a bin door di un fayo den e edificio nobo di WEB Aruba N.V.
Asja Dongen, relacionista publico di WEB Aruba N.V., a informa prome cu 2:00 a surgi un storing. Pero tur cos a cuminsa na momento cu el a haya un yamada di hotel cu a informa di no tin coriente. Na momento cu el a tuma contacto cu controle kamer, tabata e ora cu e black-out a pasa. Na prome instante nan no tabata sa kico tabata pasando.
Manera conoci y cu a anuncia ampliamente den prensa y medionan social, e planta RECIP IV ta den fase di test y no tin mucho tempo ta draai riba 100% di capacidad. E planta ainda ta den proceso di introduccion y consecuentemente no ta inclui den sistema di IGMS. No obstante esaki a logra recupera e suministro di coriente den menos cu 2 ora. Por considera esaki un tempo record pa recupera despues di un total black-out.
Na momento cu e black-out a sosode, a isola e fayo y a inicia e proceso di lanta plantanan RECIP I, II y III hunto cu e boilernan y turbina di gas. Di e forma aki a logra suministro di coriente 100% pa ELMAR dentro di 2 ora. Esaki ta hopi liher, compara cu black-out den pasado caminda nan tabata dura pa averahe mas cu 8 ora.
Awor cu e blackout ta tras di lomba y conforme WEB su protocolnan, ta sigui un ‘root cause analysis’ pa determina kico exactamente a causa e fayo y con por evita esaki den futuro.
WEB Aruba ta compronde cu e blackout aki a trece inconveniencia pa comunidad y ta extende su disculpa. Entretanto ta sigui cu inclusion di e planta RECIP IV den WEB su red di produccion, cual lo conduci na un suministro mas stabil y cu menos tempo di recuperacion na momento cu ocuri un blackout.
