Mescos cu rond mundo henter, na Aruba tambe e pandemia di COVID-19 tabatin su efectonan riba diferente area y a trece varios cambio cu ne. Specialmente den medida y maneho en general. Den cuadro di esaki por a tuma nota cu durante e pandemia WEB a kita e maneho di duna boet na e personanan cu tin cuenta atrasa. Sinembargo, recientemente WEB a anuncia cu entrante prome di januari 2022, lo bay reinstitui e boet di 10 florin riba e cuentanan atrasa.
Asje Dongen, Relacionista Publico di WEB kier a enfatisa cu esaki ta un maneho conoci caba mirando cu e compania tin 25 aña ta impone tipo di boet asina riba cuenta atrasa. Asina cu un cuenta di awa caduca, pues cu e fecha di pago pasa, lo impone un boet di 10 florin. Aña pasa, na momento cu pandemia a cuminsa, Dongen a splica cu debi cu hopi hende tabata pasando den situacion dificil, sea tin menos entrada of a perde trabou, un di e medidanan cu WEB a introduci tabata pa no cobra e boet aki mas.
Tambe Dongen a splica cu un otro medida cu nan a bin cu ne ta pa suavisa e condicionnan pa haya areglo di pago y facilita e manera di haci peticion pa esaki. Y asina a introduci varios otro medida pa purba duna e pueblo un tiki alivio.
Pa cobertura mas amplio lesa edicion di TREMPAN mañan.
