E patruyahenan intensivo di Wardacosta y Defensa ta dunando e efecto necesario. Ultimo tempo no a detecta ningun yegada di botonan ilegal riba nos islanan. P’esey Wardacosta lo sigui cu e patruyanan intensivo pa controla e fronteranan maritimo di Aruba, Boneiro y Corsou.
Pa por ehecuta e patruyahenan, Wardacosta lo sigui ricibi asistencia di unidadnan di Defensa den forma di e barco di Marina Real Zr.Ms. Zeeland cu su helicopter NH-90, patruyanan riba tera cu e vehiculonan Anaconda, militarnan riba tera y riba lama. Na Aruba Wardacosta ta haci uzo di un Unmanned Aerial Vehicle (UAV) pa controla e frontera. E UAV aki tambe ta forma parti di e asistencia di Defensa den Caribe na Wardacosta.
E meta di e vigilancia di frontera ta pa evita botonan yega tera di un forma ilegal. Sigur mirando cu actualmente Sur America tin un brote di COVID-19. Na e parti di mundo aki ainda no ta logrando contene e virus cu a costa bida na miles di persona y caminda tin hopi habitante infecta. E islanan tin e COVID-19 bou di control y kier mantene asina. Esaki ta di sumo importancia pa crecemento di e economianan local y pa crea stabilidad riba e islanan.
Wardacosta ta haci un suplica na habitantenan pa na momento cu mira algo sospechoso of peligroso riba lama of na costa, pa yama Wardacosta riba e number 913. E number aki ta alcansabel di dia y anochi. Barconan riba lama tambe por tuma contacto cu e Centro di Rescate di Wardacosta via di e canal VHF 16 na momento cu nan mira algo sospechoso of peligroso riba lama.
