Diasabra algo pasa di 11 or di mainta un vuelo di American Airlines for di Charlotte a bati alarma yegando Aruba. Piloto a haya señal di problema cu e sistema hidraulico den avion durante cu e tabata den proceso pa baha e avion. A notifica toren di control na Aeropuerto Reina Beatrix.
Personal di toren a notifica tur autoridad concerni, a despacha varios ambulance, truck di bombero como tambe pidi personal medico di DVG y Cruz Cora pa keda riba un “stand by”. Polis a cera caminda den cercania di aeropuerto.
Algo despues di 11:15 am e avion a baha sin problema. Prome cu 11:30 am polis a habri tur caminda cera pa trafico. Ceramento di e caminda principal cu ta pasa dilanti aeropuerto ta causa inconveniencia, pa cual ta purba habrie mesora despues cu cancela e alarma.
E vuelo AA9600 cu 172 pasahero abordo, hunto cu e tripulacion, a yega Aruba sano y salvo.
