Niandy Windster- Losiabaar, viuda di e defunto rapper Ruchendell ‘Boechi’ Windster , den un entrevista exclusivo cu Omroepbrabant.nl na Hulanda, a duna un poco mas detaye riba e anochi tragico cu nan como famia a pasa, kico ta locual e mes ta pensa di e crimen cu a costa bida di su casa, e indignacion durante despedida di e defunto na Hulanda y kico ta locual ta e futuro pa su famia.
Den e entrevista Niandy a haya oportunidad di expresa kico tur nan como famia a biba, na momento cu e noticia a cuminsa drenta di e asesinato na Curaçao. Pregunta cu e mes a haci for di e dia ey tabata, Dicon? Kico tabata asina grandi, kico por a pasa cu tabata asina serio cu mester a likid’e.
Dia 9 di december 2022, e rapper Boechi a presenta den Willemstad, cu lamentablemente lo a bira su ultimo. Un drive by shooting, cu e unico intencion di mata e rapper como cu e tabata directamente dirigi unicamente riba su persona. Cu su 30 aña, e victima no a sobrevivi e crimen aki.
Su casa y yiunan ta residencia na Tilburg Hulanda. Viuda ta conta cu Boechi a manda un whatsapp den careda di 5:00 am (Hulanda), avisando cu e ta bay busca algo di come prome cu e bay drumi. El a lanta, a lesa e mensahe pero como cu e tabata practicamente na soño ainda, no a duna contesta e momento ey. Tragicamente un 15 minuut despues Boechi a fayece, asesina.
Locual e casa ta corda, cu gran mayoria di hende tabata na altura caba di locual a tuma luga, hopi a reserva di tuma contacto cu ne como cu via telefon un noticia asina lo ta devastador. A tene na cuenta cu e tabata e momento ey den haya yiu, cu e tabata su so na cas cu e otro yiu chikitonan y a opta pa trece e noticia ey personal p’e.
“Mi a kibra completo, mi a grita y saca tur emocion cu tabata por afo. Mi no tabata sa kico pa haci”.
Momento cu e caha a yega
A transporta e defunto pa Hulanda. E viuda no tabata sa kico pa spera una bes e caha ey a habri. Cu lagrima na wowo a conta cu su casa tabata drumi cu un sonrisa riba su cara den su caha di morto.
Un despedida turbulento
Bo no por imagina algo asina aki. A organisa un despedida na Koning Willem II Stadion pa asina tur cu ta mas cerca di Boechi por a haya oportunidad di bisa ayo. Locual cu a sosode no ta algo cu a pensa di lo a tuma luga, esaki a bay completamente for di man.
A surgi un confrontacion grandi entre publico cu a presenta, cu a caba na agresion y bashamento di bala. Algo cu famia a tuma masha masha na malo mes. Increiblemente, e mes un anochi a sosode un otro asesinato, cu aunke no ta relaciona cu esun di Boechi, a lanta speculacion como cu e persona asesina tambe tabata presente na e velorio un rato prome e dia ey.
Debi na e situacion tenso cu a lanta, door di e asesinato aki den e area, a bin cu hopi regla adicional di parti autoridad pa locual cu ta e entiero di Boechi cu mester a tuma luga. A haci peticion pa tene e caha di e defunto cera durante entiero, pero famia a apela na esaki como cu ta ultimo biaha cu nan lo tin di bay mira nan ser stima.
Na momento di bisa e ultimo ayo, esaki a bira un falta di respet enorme den e funeraria. Famia mes no a haya chens ni pa yega cerca di e caha, como cu hende a rondona e caha y te hasta bolter e tapa di caha benta abou. Desformal!
Viuda a pidi pa nan por a sikiera haya 10 minuut pa nan por despedi, a tuma mic den man y apela bou grito pa nan por hala for di e caha pero en vano. E momento ey a dicidi cu no tin otro opcion cu di yama polis pa bin atende cu e situacion.
A destrui su graf
No tabata suficiente tur locual cu e famia tabata pasando aden caba, a bay na e graf di e defunto y destrui esaki. Cada biaha, gasto relaciona cu Boechi su entiero tabata bira mas y mas halto. No solamente locual cu ta basico pero e gasto cu a surgi debi na e destruccion y ladronicia (alcohol) cu a tuma luga na Koning Willem II Stadion y demas preparacion y limpiesa, tanto eynan como di e bisiñanan den e area, personal di polis cu mester a activa adicionalmente, cu mester a tuma luga despues di e despedida cu a organisa.
Un recaudacion di fondo tabata activo pero gran parti mester a bay na paga gasto cu a menciona di e destruccion causa.
Lo respeta semper e memoria di su casa
Niandy ta confia den e bida cu nan tabatin, no ta hinca man den candela pa ningun hende pero e tabata conoce su casa y ta sinceramente sigur cu e no tabata meti den e baho mundo ey. A convivi den cas pa hopi aña y ta algo cu semper e defunto a aleha su mes for di dje. Tabata stima y cuida cu famia y e sa cu nunca lo a hinca nan den un peliger asina ey.
Un otro rapper asesina
Algun luna prome cu e crimen di Boechi, un otro colega rapper tambe a perde su bida tragicamente y den e mes un forma, asesina. Productor musical Zikki Martina tambe tira mata, den area di Rotterdam. Segun e viuda esaki lo ta un coincidencia porta, cu e tambe tabata asesina cruelmente y ta pensa cu esun no tin nada di haber cu e otro. Berdad nan tabata amigo di otro den e ambito musical, a colabora cu otro den cancion y tabata den bon comunicacion cu otro pero no mas cu esey.
Tin dos sospechoso deteni
Entretanto tin dos persona deteni relaciona cu e asesinato di Boechi, caminda un di nan a resulta di ta famia di e victima. Lo ta hopi straño cu esaki bin resulta di ta asina, ta locual e viuda a bisa. Imagina cu e tabata sa cu e ta famia y asina mes a opta pa asesin’e. Te awo ta bisa cu e persona ey ta e sospechoso cu e tira y mata Boechi. Cada biaha e storia ta bira poco mas loco.
Diferente scenario a pasa den su cabes, e sa cu su casa nunca lo a pone su mes den e situacion ey, e ta prefera di keda kere den locual cu e sa di su casa y ken e tabata como persona y kico cu bin afo di e caso aki, e motibo di e asesinato, e lo ta mentalmente prepara p’e.
Su tarea awo ta di cuida e memoria di e tata pa su yiunan, un tata hopi dedica cu tabata stima su famia y asina ey kier record’e. E miho cu e por haci pa su mes un estado mental, ta corda e defunto manera e tabata, no obstante e resultado di e investigacion relaciona cu su morto.
Fuente: Omroepbrabant.nl
