Durante conferencia di prensa Minister di Asuntonan Economico, Geoffrey Wever, conhuntamente cu Presidente di Camara di Comercio, Gavril Mansur, a anuncia Virtual Business Matchmaking Event p’e comerciantenan di Aruba conecta cu e comerciantenan di Venezuela. Esaki lo tuma luga dia 9 di november binidero, cuminsando pa 10:00 di mainta y lo tuma luga na Kamer van Koophandel (KvK).
A organisa e Business Matchmaking Virtual den un colaboracion entre Ministerio di Asuntonan Economico y KvK. Minister Geoffrey Wever a indica, cu despues di a mira e potencial comercial durante e Trade Mission pa Colombia e aña aki, a fortifica su vision mas ainda, pa enfoca riba establece y fortalece e lasonan comercial cu nos paisnan bisiña, pa cual Venezuela tambe tin oportunidad.
Nos intencion ta pa trece e exportadonan Venezolano, specialmente den e industria di alimentacion y material di construccion den contacto cu e importadonan Arubiano. Minister Wever ta mira espacio pa awo stimula y facilita hacimento di negoshi entre Aruba y Venezuela ya cu esaki ta na beneficio di e consumidor cu posiblemente por beneficia di miho prijs of mas variacion y obtenibilidad di producto.
“Colaboracion entre partner den e region na beneficio di nos comerciantenan y e consumidor ta keda un prioridad”. Lamentablemente nos a wak prijs di producto di alimentacion y construccion subi e ultimo lunanan y esaki ta un manera pa trece miho prijs pa nos cuidadanonan. Minister Wever ta gradici Mansur y henter e ekipo di Camara di Comercio pa ta un partner importante pa logra realisa e evento aki, un muestra di e potencial di colaboracion entre sector priva y gobierno.
E comerciantenan cu ta interesa den participa den e Virtual Business Matchmaking ta curasha pa inscribi door di manda un e-mail na: [email protected]. Tambe por acudi na social media di Minister Geoffrey Wever caminda tin un link obtenibel, of n’e representantenan di Camara di Comercio pa mas informacion y registracion.
