Violencia domestico ta ora cu den un famia tin conflicto entre pareha. Violencia domestico ta e comportacion abusivo y violento den un relacion causa door di un pareha pa haya of mantene control y poder riba e otro pareha. Violencia domestico por ta abuso verbal, fisico, sexual of psicologico y por pasa entre pareha heterosexual y tambe homosexual. Esaki ta e tema di e biaha aki cu Sociaal Crisis Plan kier pone atencion riba dje. Nan ta splica lo siguiente den e relato.
Un mayor of un cuidado di mucha cu ta den un relacion abusivo por pensa cu e violencia no ta afecta e muchanan den famia. Pero hecho ta cu hasta si e muchanan no ta wak e actonan di violencia aki, nan ta afecta pa e conflicto den famia. Un mucha por desaroya problemanan serio emocional y di conducta. Lamentablemente, e problemanan aki hopi biaha no ta wordo reconoci pa nan mayor of cuidadonan y esaki ta resulta cu e mucha no ta haya e ayudo psicologico cu e tin mester.
Ora ta trata di violencia domestico entre pareha, hopi biaha ta trata tambe di abuso di mucha. Por causa e mucha daño accidentalmente pero tambe intencionalmente. P’esey ora ta trata di caso di violencia domestico semper mester pensa ariba e bienestar y siguridad di e muchanan den e cas.
Con pa señala violencia domestico?
Pa bo por yuda un mucha cu ta biba den un cas cu conflicto ta importante pa reconoce cierto señalnan. E señalnan aki por ta varios y ta diferencia pa cada mucha su situacion specifico. E ta importante pa semper tene cuenta cu tin e posibilidad cu e señalnan aki no semper ta duna indicacion cu tin violencia domestico andando y cu esakinan por a wordo causa door di otro motibonan. Pa e motibo aki semper mester keda alerta y no keda keto pa busca ayudo of conseho di nos profesionalnan. Pasobra cu e accion corecto bo por salba un bida.
Señalnan di violencia domestico den muchanan chikito:
E mucha tin hopi ansiedad of un aumento di miedo
E mucha ta desaroya depresion
E mucha ta perde interes den scol, amigonan of cosnan cu e ta gusta haci
E mucha tin problema pa drumi, ta haya mal soño of ta pishi cama frecuente
E mucha ta agresivo
E mucha tin hopi rabia den su curpa
E mucha ta pasa hopi mas tempo su so
E mucha ta bringa na cas of na scol
E mucha ta “bully” otro mucha of ta bira victima di “bullying”
E mucha su apetit ta cambia completo
Señalnan di violencia domestico den hobennan:
Ta cuminsa uza droga of alcohol
Ta falta hopi na scol of ta “spijbel”
Ta cambia di grupo di amigo, cu mal influencia
Ta desaroya un actitud rebelde y ofensivo
Ta cay atras den lesnan na scol y su puntonan ta baha
Ta aleha su mes socialmente di su amigonan
Ta desaroya depresion of tin hopi ansiedad
Ta perde interes den scol, amigonan of cosnan cu e ta gusta haci
Violencia domestico por sosode cu cualkier persona y hopi biaha e berguensa personal of pa famia ta stroba un persona pa busca ayudo. Pero nos mester corda cu si un conflicto entre pareha desaroya den violencia domestico, si no busca e ayudo necesario e no ta bay stop.
Si bo ta un victima of conoce un persona cu ta pasando den violencia domestico y mester di ayudo por fabor tuma contacto cu Fundacion Contra Violencia Relacional (FCVR) na 567-1670. Ora bo ta sospecha abuso di menor tuma contacto cu Bureau Sostenemi na 588-1010 pa conseho y ayudo. Si bo ta den un situacion di emergencia y bo ta sinti cu bo bida di bo yiunan ta na peliger yama Polis na 100. Actua mesora, no keda keto!
Pa haya sa mas tocante abuso di menor bishita nos website www.scparuba.com. “E bienestar y siguridad di nos muchanan ta e responsabilidad di nos tur” – Sociaal Crisis Plan
