Recientemente Carlos Rafael Faría Tortosa, actual minister di relacion exterior di Venezuela, pa medio di un publicacion riba Twitter a informa cu Reino Hulandes conhuntamente cu Venezuela a confirma nan boluntad pa traha hunto den e implementacion y ehecucion pa e reapertura gradual di frontera entre e islanan den Caribe y Venezuela.
Alabes a acorda cu den corto plaso lo tene un di tres reunion na Willemstad, Corsou caminda lo trata principalmente, pero no exclusivamente, e comercio maritimo gradual di producto.
Den un comunicado di e Republica Bolivariana di Venezuela nan ta confirma cu hunto cu Reino Hulandes, a yega na un acuerdo pa traha hunto pa e implementacion di e reapertura di e frontera entre Venezuela y islanan den Caribe. E decision aki ta den interes y beneficio di ambos, teniendo den consideracion e interes cu ambos tin pa desaroya intercambio economico y social.
Hunto a declara cu:
1: Lo acorda mecanismo di trabou cu lo permiti ambos pa trata di un manera coordina y facil, e temanan den e areanan di interes comun, cu e motibo di e reactivacion gradual di e conexionnan maritimo y aereo entre Venezuela y Aruba, Bonaire y Corsou.
2: Lo tene na cuenta e combersacionnan y acuerdo discuti previamente entre ambos partido, incluyendo e reunionnan di consulta tecnico teni na Willemstad dia 10 di maart 2020 y 15 di december 2020 na Caracas.
3: Lo tene e di tres reunion di consulta tecnico na Willemstad, Corsou, den corto plaso, caminda principalmente lo trata e comercio maritimo gradual di producto.
4: Ta reafirma e boluntad pa haci conhuntamente haci esfuerso pa garantisa e siguridad na frontera entre ambos.
Mientrastanto Gobierno di Aruba a informa cu e situacion rond di e apertura di frontera cu Venezuela ta mescos cu e lunanan anterior. Actualmente ta den espera pa sinta na mesa cu Venezuela pa por cuminsa cu deliberacion. Ya ta hibando combersacion riba esaki pero e negociacionnan mes no a cuminsa ainda.
Manera ta conoci, Aruba y Reino Hulandes ta para pa un reapertura di e frontera tuma luga den fase, cuminsando cu e frontera maritimo. Pero prome cu yega na esaki mester tin palabracion concreto. E combersacionnan pa yega na e palabracionnan aki ainda no a cuminsa.
