Calixto Coffi ta un cantante di e bario di Antriol y unda cu e bay, e ta cana cu su guitara. Unda cu e yega, e gusta deleita hende cu su canticanan simplemente pasobra e ta un persona cu gusta musica. Durante hopi tempo el a sa di siña diferente mucha musica cu a yega di gana den festival.
Calixto Coffi a cuminsa toca desde mucha. Cu su diescuater pa diescinco aña e tabata toca bass guitar den e prome beat band di Boneiro, esta The Golden Sax. E ta corda cu el a pasa man p’e bass guitar cuminsa toca y a haci esey sin cu un hende a siñ’e. Di eynan el a sigui toca den mas beat band.
Na 1977 mas o menos, Calixto a drenta servicio militar aki na Aruba. Pero pa motibo cu musica ta den dje, el a bira corporal di dos strepi. E no por a keda simplemente pasobra musica tabata yam’e. El a bay bek Boneiro pa haci musica. Aki Calixto a cuminsa composita, skirbi musica, siña e muchanan canta. Despues el a siña toca guitara, a siña canta, canta ranchera. “Mi gusta muziek. Muziek ta den mi”, el a expresa.
Desaroya cantante
Door cu e tabata siña mucha, un di nan tabata Raul Piar, kende ta biba aki na Aruba. E mama di Piar a acerc’e den temporada di tumba contest hubenil. Piar su mama a pidi Calixto composita un piesa p’e, y e no a gana. Raul a bay hopi cerca Calixto, kende a desaroy’e pa bira un bon cantante.
Cantamento no ta facil, segun Calixto Coffi. Cantamento ta sentimento cu un hende mester tin pa por canta. Esey ta loke el a haci esey cu Raul Piar, Denise Coffie, Efacio Clement, Claira, Liesje Thomas. Tur e muchanan ey a gana festival di canto.
Mensahe
P’e hubentud di Boneiro cu ta gusta musica, e mensahe di Calixto ta pa nan stima musica. Tambe pa nan uza musica cu ta adecuado pa cada un. E ta pidi pa no copia. El a splica cu e tipo di musica cu e gusta ta ranchera y reggae. Posiblemente tin hende lo bisa cu esey nota cuadra, pero “si bo gusta un cos, hacie bon y bay p’e.”
