Diamars banda di 11’or y mey di mainta, informe a drenta cu na Sabanilla Abou un UTV a dal kibra den cura di cas y cu esnan den e UTV a bandona e sitio. Polis cu a yega na e sitio en berdad a topa cu un UTV full kibra parti dilanti, mita riba caminda y un cura di palo kibra.
E doño di e cas cu a yega un rato despues, a laga sa cu for di basta tempo el a spera esaki ta bay pasa. Segun e ta splica, cu tur ora nan sa pasa cu basta velocidad dilanti su cas y hasta cu e tourguidenan sa pasa riba e pida tereno na e cas di bisiña na otro banda y ta keda spin den e santo. Naturalmente e turistanan, curasha pa nan tourguide, tambe ta haci mescos.
A yega di trata di papia cu e tourguide riba nan compartacion, pero e contesta cu nan ta dun’e ta cu nan ta turista y e tourguide y compania ta biba di turistanan.
Claro cu esaki no ta cay den bon tera, pasobra cu ta turista, esey no kiermen cu por tene mas na cuenta cu demas hende cu ta biba banda e ruta cu nan ta core y tur e molester cu nan ta causa. A bay asina leu di a pone piedra riba e tereno di e bisiña na otro banda di caminda, pa asina stroba esnan den nan UTV y ATV pa haci nan maniobranan.
E compania segun informe cu su UTV a accidenta, ta e compania di ABC Tours. A laga takel e UTV, ya cu e no tabata apto mas pa core.
Mientrastanto e doño of sea un representante a yega na e sitio cu e manehado di e UTV y a papia cu e doño di e cura kibra, pa wak con nan por yega na un acuerdo pa cubri e gasto y con pa haci den futuro cu esnan di ABC Tours core na un manera mas responsabel y cu menos molester.
