Polis mester a intermedia diamars mainta den un problema familiar den Scobillostraat, unda problema a sali for di man.
Sinembargo na yegada di e patruya a topa solamente cu un damita, kende a splica cu berdad tabatin un discusion y durante esaki un familiar a dal’e. El a splica nan cu e familiar hoben a bandona e sitio den un Yaris color cora. El a informa e polisnan tambe cu e cos lo no keda asina, ya cu e ta bay entrega keho.
E informacion cu polis a haya ta cu e hoben ta bayendo departamento di Reclassering, pero a manda un alerta pa detene, ya cu keho ta bay wordo entrega.
A sigui un investigacion unda polis a bay na un adres robes, mientras cu patruya di Playa a bay oficina di Reclassering y berdad a topa cu e hoben eynan.
Berdad a topa cu e hoben, kende ta bou guia di funcionarionan di e departamento aki despues cu el a haya su mes envolvi den cierto situacion. E ta conoci tambe como un persona hopi trankil. E polisnan a keda warda te ora cu el a caba cu su guia.
Na salida el a splica cu e kier drecha su bida y hasta sigui cu su estudio, pero e no ta haya e ayudo na cas. E ta sinti mas bien cu nan ta provoc’e. Segun el a splica tambe, e ta dispuesto pa pidi dispensa, pero e familiar tambe mester pidie dispensa pa motibo cu el a falt’e respet tambe.
Na final el a expresa cu e no kier mas problema, pasobra el a pone como meta pa drecha su bida, y caba cu su estudio.
Polis a detene pa combersa cu ne.
