Universidad di Aruba ta organisa e prome “International Conference on Small Island States and Sub-National Island Jurisdictions”, den colaboracion cu Centre of Excellence for the Sustainable Development of Small Island Developing States (COE) y e UNESCO Chair in Island Studies and Sustainability, cu ta comparti entre ‘University of Prince Edward Island’ (UPEI) di Canada y Universidad di Malta. E conferencia ta tuma luga di 26 pa 29 di maart 2019.
E tema di e conferencia ta “Island States and Island Territories: Sharing Stories of Island Life, Governance and Global Engagement”. Enfoke principal di e conferencia ta e diferencia y e similaridadnan entre e islanan, cu ta completamente independiente, “Small Island Developing States (SIDs)” y e islanan cu ta mantene un laso politico of constitucional cu podernan metropolitano, manera ‘Subnational Island Jurisdictions’ (SNIJs). Un di e metanan principal di e conferencia ta pa delibera riba bida, gobernacion y compromiso global tocante, pa y cu e SIDs y SNIJs.
Dr. Jim Randall (UPEI), co-presidente di UNESCO, ta presidi e comision di planificacion internacional di e conferencia. Co-anfritrionnan local ta Arno Boersma y Francielle Laclé di COE, Mr. Glenn Thodé, Rector di Universidad di Aruba, Patrick Arens, ‘Business Director’ di Universidad di Aruba y Deborah Alexander, ‘Coordinadora’ di Centre for Lifelong Learning (CLL) di Universidad di Aruba. E comision di planificacion ta consisti di varios institucion academico incluyendo‘University of West Indies’, ‘Vrije Universiteit Amsterdam’, ‘University of Malta’, ‘Leiden University’ y ‘University of the West of England’.
Segun Rector di Universidad di Aruba, Mr.Glenn Thodé, bon gobernacion ta necesario pa por tin un sociedad husto, pa garantisa derecho humano y empodera nos ciudadanonan. Esaki ta conta pa tur sector den comunidad, tanto publico como priva, NGO’s y academia. Cua ta e aspectonan unico di e islanan insular. Con structura institucional di islanan chikito ta yuda of limita e habilidad pa yega na e metanan sostenibel di Nacionnan Uni.
Nos ta spera di por intercambia cu hopi participante di e evento unico aki, cu lo crea un plataforma pa trece claridad riba e preguntanan aki.
E conferencia ta presenta varios tema central. E prome presentado principal, cu ta habri e mainta di 27 di maart, ta distinguida Señora Evelyna C. Wever-Croes, Prome Minister di Aruba y Minister di Asuntonan General, Integridad, Energia, Innovacion y Organisacion Gubernamental. Su presentacion tin como enfoke bon gobernacion. E ta kere cu un acercamento cu e ser humano central den desaroyo di maneho, combina cu inversion substancial den innovacion ta e unico forma di contribui na un futuro sostenibel pa generacionnan venidero.
E di dos presentacion, dia 28 di maart pa 8:30 di mainta, ta di distinguida Señora Leona Romeo-Marlin, Prome Minister di Sint Maarten y Minister di Asuntonan General. Su tema lo enfoca riba resistencia di e islanan y gobernacion,despues di horcan Irma y Maria na 2017.
E di tres presentacion, un evento habri pa publico en general, riba diahuebs 28 di maart di 19:30 pa 21:30, ta di Dr. Godfrey Baldacchino, un academico y investigado mundialmente reconoci, cu a dedica esfuerso y energia considerabel na crecemento di area di investigacion di islanan, particularmente pa engrandece conocemento di e diferente categorianan di teritorio di isla chikito. E tema di su discurso ta“Woke up, got out of bed, dragged a comb across my head: A day in the life of a SNIJ resident”.
Finalmente, e di cuater presentacion ta na encargo di Dr. Peter Clegg, profesor asocia y hefe di departamento di Salud y Ciencia Social na University of the West of England,na Bristol. E tabata un visiting research fellow, tanto na KITLV/Royal Netherlands Institute of South East Asian and Caribbean Studies, na Leiden, Hulanda, y na Sir ‘Arthur Lewis Institute of Social and Economic Studies (SALISES)’ na ‘University of the West Indies’ na Jamaica. Tema di su presentacion ta ‘Beyond Brexit and Cotonou: New Regionalisms in the Caribbean?’.
Tur presentacion ta tuma luga den Aula di Universidad di Aruba.
E conferencia ta apela na academico-, desaroyado- di maneho, representantenan di ‘NGO’s’, studiante y publico en general, cu tin interes pa dialoga tocante bida isleño na Aruba, Caribe, Pacifico y internacionalmente.
Pa registra pa ful e conferencia of un of mas dia bishita: https://www.eventbrite.ca/e/1st-international-conference-on-island-statesisland-territories-tickets-52213877112.
Lo anuncia detaye di un foro publico cu entrada liber, pronto.
Pa mas informacion por bishita http://projects.upei.ca/unescochair/island-statesisland-territories-an-international-conference/ of tuma contacto via [email protected].
E comision di planificacion ta gradici sponsornan di e evento; Ministerio di Asuntonan Interior y Relacionnan den Reino, Guardian Group Fatum, University of the West of England, Aruba Tourism Authority, e Think To Do Institute, Aruba Aloe y Smit & Dorlas Coffee.
