Ministernan di finansas di Union Europeo ta premira pa saca Bermuda, Aruba y Barbados for di e blacklist di paraisonan fiscal, e fin di siman aki, adina un oficial di Union Europeo a bisa dialuna. A agrega e tres islanan na e lista den luna di Maart, pasobra Union Europeo a haya deficiencianan den nan normanan fiscal cu por faborece evasion fiscal den otro estadonan.
E decision, cu lo wordo formalisa pa e Ministernan di Finansas di Union Europeo, den un reunion cu lo tuma luga diabierna, lo kita solamente teritorionan di Union Europeo cu actualmente ta riba dje, for di e lista.
Paisnan di Union Europeo ni sikiera ta wordo evalua, ya cu ta considera nan conforme, aunke cu Parlamento di Union Europeo a acusa shete di nan pa actua como paraisonan fiscal. Nan ta Luxemburg, Cyprus, Irlanda, Malta, Hungria, Belgica y Hulanda.
E decision di inclusion a wordo haci pa e 28 Gobiernonan di Union Europeo. Cada un di nan tin e poder pa impone cualkier decision riba e asunto aki.
Hurisdiccionnan ta wordo kita for di e blacklist ora cu nan atende nan deficiencianan y compromete pa realisa mas reforma pa aumenta transparencia fiscal.
Cu salida di e tres islanan aki, e blacklist lo reduci na 12 hurisdiccion. Esaki lo inclui ainda Emiratonan Arabe Uni, Oman y e tres teritorionan Mericano, esta American Samoa, Guam y US Virgin Islands. Otro hurisdiccionnan riba e lista ta Belize, Fiji, Marshaal Islands, Vanuatu, Dominica, Samoa y Trinidad & Tobago.
Estadonan cu ta riba blacklist, ta confronta daño di reputacion y controlnan mas estricto riba transaccionnan cu Union Europeo. Union Europeo a establece e blacklist na December 2017, despues di revelacion di eskemanan di evasion fiscal generalmente uza pa corporacion y personanan cu placa pa reduci nan impuestonan.
E lista inicialmente a compromete 17 hurisdiccion, pero ta mara na revisionnan regular. E paisnan cu deficiencianan legal ta wordo agrega si nan no drecha nan regla y plasonan estableci.
