Un mahos bista y un inconviencia grandi, no solamente pa e bishitantenan local, pero principalmente pa turista. Baño daña y luz tira abou riba pleno Welcome Plaza.
Por a compronde cu e situacion aki ta algo di algun siman caba. Un Welcome Plaza sin baño publico mientras cu waf ta yen di barco crucero den porta. Turista cu ta baha di barco y cana rond no por haci uzo di baño pasobra esaki tin algun siman for di servicio.
Na mes momento tambe por mira palo di luz, cu ta decora e plaza, tambe tira abou y saca por completo for di su base den tera. Por a compronde cu a tuma contacto cu DOW pa bin drecha esaki of por lo menos kita esaki for di bista publico pero te cu dia di awe esaki no a tuma luga.
Ta haci un apelacion na e instancia concerni pa tuma accion y drecha e incomodidad aki pa e publico cu ta bishita dicho localidad turistico.
