E organisacionnan di Hammershark y Aruba Juniors a organisa e “1st International Youth Baseball Camp”, di cual nan a invita Curaçao Baseball Academy (CBA) pa participa na esaki. E camp di baseball ta desde 4 te cu 7 di April, unda cu 100 mucha a inscribi pa asina participa na esaki. durante e camp aki e muchanan a ricibi training y tipnan for di diferente coach.
Coachnan boluntario cu a participa na e baseball camp ta Kenneth Desbarida, Leroy Antionia, Ando Cientje, Jairo Quandt y Luigi Yañez. E cantidad di mucha cu a inscribi pa participa ta algo cu Curaçao Baseball Academy ta custumbra di atende, asina Jairo Quandt, coordinador di Curaçao Baseball Academy, a expresa. E organisacion aki tin coachnan cu ta di seleccion nacional di Corsou. Pa participa den e 1st International Youth Baseball Camp na Aruba, pa nan esaki ta un reto nobo y ta premira cu cosnan lo bay bon. A parti e grupo den dos orario di cual e prome training ta di 8:30am-1:00pm y 2:30-6:30pm unda cu a conta cu 50 mucha respectivamente na veld di Aruba Juniors.
Awo Curaçao Baseball Academy ta traha cu e organisacionnan aki di Aruba, pero nan tin afiliacion cu otro academianan. E academianan aki ta haci uzo di CBA den parti di Caribe. “Aruba a bini Corsou pa un torneo y nan a mira nos operacion. Nan a gusta y nan kier a bin Corsou”, asina Jairo Quandt a expresa. A conseha nan pa no bay Corsou, pero nan a bin Aruba pa asina brinda un clinica mas barata.
Tambe a invita mayornan cu tin aspiracion pa siña mas di baseball durante e clinica aki, unda nan lo por mira e training. Tur coach di baseball di Aruba tambe ta bon bini pa presenta na e clinica aki, unda nan lo participa.
E coachnan cu a bin di Corsou tin nan certifica di MLB den CDP y nan ta trece nan conocemento dilanti. Tambe nan ta trece tur faceta cu a cambia den baseball. Esunnan cu presenta na e clinica aki ta siña mas y despues por bay cu tur informacion bek na nan organisacion pa asina aki siña nan muchanan.
