Diaranson anochi a pidi presencia di polis pa un situacion bastante serio tumando luga den Dakota. Na prome instante tabata papia di bringamento, despues a informa cu lo tabata tin hende cu arma den area y asina cada rato e situacion tabata bira mas serio.
Varios unidad a presenta y a cuminsa un buskeda den diferente caya di Dakota, entre otro Pindastraat y Makapruimstraat. Locual por a componde cu tabata tin un bringamento cu a tuma luga un rato prome, esaki lo a continua den cercania di Centro di Bario Dakota, na e veld caminda posibelmente lo a tira piedra riba e publico presente y despues a drenta infromacion di un vehiculo circulando den bario cu posiblemente hende arma aden.
Segun por a compronde, e buskeda pa un tal “Calbas” lo tabata tin e polisnan coriendo di un caya pa otro. Despues di un rato a presenta na un cas y cu autorisacion di doño di cas a drenta y haci nan buskeda. A tuma nota di hende cu a sali na careda como tambe un persona deteni na sitio. Esaki no a bay fasil. Esnan presenta a purba di stroba e detencion di tuma luga y polis mester a actua man duro cu nan pa evita cualkier intencion robes.
Tin cu bisa tambe cu e situacion no tabata nada sigur pa e coleganan di prensa na sitio. Un grupo grandi di hoben a cuminsa lanta cu prensa cu intencion di agredi e coleganan cumpliendo cu nan trabou. Por a tuma nota di piedra y boter tira den nan direccion cu a haci e situacion aun mas tenso. Despues di detencion a transporta un hoben pa warda di polis mientras a keda monitoria e resto pa asina nan bandona sitio.
