No ta prome biaha cu polis ta bay na e crusada di Sero Blanco, net banda di un cas, caminda tin un negoshi vegetariano. Un biaha mas a sosode un accidente cu a laga basta daño material.
Diasabra anochi, mas of menos 9:20 pm, un Nissan March colo preto, numera A-64066 y un Suzuki Swift colo preto, numera A53951, a haya nan mes envolvi den e accidente, cual, segun cu por a tuma nota, tabata pa motibo di falta di preferencia.
El a sosode di tal manera cu e Nissan March a subi cura di e cas ya menciona. A pidi asistencia di ambulance, mirando cu tabatin dos mucha envolvi. Polis di trafico tambe a presenta na e sitio pa asina tuma tur dato di loke a sosode.
Daño tabata considerabel.
Un bisiña a presenta y a expresa cu den varios ocasion el a pidi DOW pa pone un sleeping police na e crusada, pero parce cu su peticion tabata manera un grito den desierto.
Tin cu remarca cu ya tin varios accidente a yega di sosode den pasado y hasta morto a yega di cay algun aña pasa, un biaha mas pa motibo di preferencia. Ta pa e motibo aki mes bisiñanan ta desea pa haci algo mas pronto posibel pa asina evita cu sosode mas accidente.
