Na maart ultimo nos a bishit’e na su cas ora cu Rene Wild a yud’e cu un dieet balansa pa baha peso. E tabatin mester di un cama nobo y special pa wanta su peso, cu tabata riba 300 kilo. Probablemente e tabata un di e hende muhenan mas pisa riba nos isla. Ayera nochi laat el a fayece na Hospital na edad di 55 aña, debi na complicacionnan cu pulmon. Uba tabata casa pero no tin yiu. E ta un persona conoci y stima den e bario di Dakota.
Josefina Mercelina Thode, di 55 aña, ta un señora conoci den Dakota, como Uba. Tur hende conoc’e den e vecindario aki. E tabata biba den Cadushistraat, percela nr. 3. Uba tabata biba den un camber, cu por bisa cu pa 10 aña e no a sali. E tin su motibonan tambe.
Rene Wild a cuminsa yuda Uba den un esfuerso pa e baha peso y pa e por cuminsa biba un bida normal bek. A forma un team cu a consisti di dr. Thuis, Rudy Carti, Marilee Arends, Julaika, kende ta e nurse di Uba, Azriah de Palm, kende ta duna les na EPB y a acerca Wild pa duna un man. E tabata un proyecto pa yuda un persona den necesidad. Den e caso aki ta sobrepeso y pa yud’e baha peso.
Ora a cuminsa yuda Uba, a topa cune cu un peso di alrededor di 345 kilo. Hopi lihe, despues di a cambia su plan di comemento, a yega 310 kilo y despues cu mas esfuerso a logra baha te na 264 kilo. Pues, por a nota un cambio y esfuerso di su parti pa por baha peso. E no tabata facil, pasobra e no por move. E tabata un tiki limita den e banda ey. Asina mes cu el a logra baha cu tur e kilonan ey, el a haci su best pa baha. Rene Wild a conta cu su actitud tambe a cambia hopi.
Lamentablemente siman pasa caba el a haya un griep, cu a desaroya y dado momento a bira un pulmonia. A intern’e den Hospital pa tratamento. Ora el a mehora, a lag’e bay cas. Ayera sinembargo el a bolbe bira malo y a confronta complicacion serio cu su pulmon. Hospital a intern’e atrobe pero ayera nochi 11’or a informa cu Uba no a logra gana e bataya cu su salud y a fayece.
Na su famia nos ta expresa palabranan di mas profundo condolencia y cu Uba por sosega na paz.
