E problema tabata andando algun dia. El a culmina diasabra atardi net na e momento cu e cura di taxi tabata ful na aeropuerto, pa colmo riba un “Super Saturday”. Aki e dos taxistanan, pa colmo cu ta casa, a bringa pa un colega femenino cu ta traha como “hulpchauffeur”.
E taxista di TX-202 ta esun cu a haya hinca. El a yega rabia bou di e dak unda taxistanan ta sinta y dal e colega rival TX-442 un wanta di sorpresa. Coleganan a purba wanta nan pero no a logra.
Asina mes riba videonan cu a sali por mira cu TX-202 tabata tin un arma skerpi den su man. Coleganan a purba aleha nan for di otro. Esun cu a haya wanta a cana bay berdad na su auto. Pero parce el a bolbe y bay bringa cu arma den man. E tabata tin un arma skerpi cu el a uza pa corta e taxista di TX-202 cu a pas’e un bon wanta un rato prome.
Videonan graba pa e propio taxistanan ta importante pa aclaria con e agresion y intento di asesinato serio aki a tuma luga. Polis a interveni y ta investigando e caso awo. Ta pendiente ki paso Departamento di Transporte Publico (DTP) lo tuma den e caso aki contra e taxistanan envolvi. Tambe nan por spera sancion di Aruba Airport Authority, mirando nan comportacion riba tereno di aeropuerto.
