Corsou, Aruba y Sint Maarten mester stop di opone na matrimonio entre e personanan di e mesun sexo. Esey t’e opinion di mayoria den Tweede Kamer. A pesar di varios sentencia hudicial, e islanan ta sigui resisti n’e introduccion di matrimonio entre e personanan di e mesun sexo. Nan kier bay Corte Supremo.
Ta incomprendibel, Tweede Kamer ta opina. VVD, D66, PvdA, GroenLinks y JA21, a pidi e Secretario di Estado responsabel Van Huffelen, pa hiba combersacion cu e islanan pa convence nan pa bandona nan oposicion n’e matrimonio entre e personanan di e mesun sexo.
Como contesta, secretario di estado a revela dialuna cu e ta kere cu henter reino no mester importa ken ta stima y cu ken kier casa. “Na Hulanda, nos a laga e debate aki atras. Mi ta mira cu Corsou, Aruba y Sint Maarten, e hendenan ainda no a yega n’e punto aki di e debate.”
DEN CASACION
Na december, Corte Comun di Husticia di e isla a dicta den casacion den dos caso, cu Corsou y Aruba mester habri pa matrimonio entre e personanan di e mesun sexo. Gobierno di e islanan Caribeño ta nenga di haci esaki y ta recuri n’e sentencia den casacion.
Formalmente, Hulanda por haci poco riba esaki. “Reino no ta un imperio colonial,” Prome Minister Rutte a bisa na principio. Esaki ta a base di un pregunta cu 24ora.com/TREMPAN a haci prome minister Rutte durante un rueda di prensa na december 2022, despues cu e Rijksministerraad a tuma luga, unda cu el a indica fuera di esey, cu Hulanda no por obliga Aruba pa acepta matrimonio homosexual. Pero cu mesun partido, VVD, no kier resigna n’esaki.
“Aunke Corsou, Aruba y Sint Maarten ta pais autonomo, n’e mesun momento kier sa unda nos ta para si nan mester algo di nos,” parlamentario Kamminga a bisa. “E ora si nan kier ta un solo reino. E ora tambe nos mester ta cu matrimonio gay.”
Presidente di partido PvdA, A. Kuiken, tambe ta cost’e traga cu e tres islanan di ex-Antias ta pone asina tanto resistencia n’esaki. “P’esey, e secretario di Estado mester hiba dialogo cu nan y laga sa bon cla cu e actitud aki ta inaceptabel.”
Su colega di D66, Wuite, ta di acuerdo: “Matrimonio entre e personanan di e mesun sexo ta un derecho pa cual D66 a lucha hopi. Mi ta kere cu na cualkier luga di reino, tur hende mester ta trata igual. Asina ta cu e personanan di e mesun sexo tambe mester por casa na Corsou, Aruba y Sint Maarten.” JA21 y GroenLinks ta di acuerdo.
Pa mas detaye lesa TREMPAN.
