Desde 1980, Nacionnan Uni su organisacion World Tourism Organization a celebra World Tourism Day riba 27 di september. Esaki ta un momento pa para keto y celebra e industria di turismo, con esaki ta conecta mundo henter. Nos redaccion tabata presente na un conferencia presenta pa Aruba Tourism Authority (ATA) y mas partners, World Tourism Day 2023 Conference, na unda cu tabata tin diferente presentacion cu presencia di varios gremio, mandatario, departamentonan gubernamental, instancianan y personanan cu ta contribui directamente of indirectamente na nos industria di turismo.
Fuera combersa cu entre otro Minister di Turismo, CEO di AHATA (Aruba Hotel & Tourism Association), Ronella Croes CEO di Aruba Tourism Authority (ATA) y mas, nos a bay riba caya tambe un rato pa combersa cu diferente persona cu ta traha den e sector di turismo, manera tambe nos turistanan.
Nos a puntra nan kico ta nan mensahe den cuadro cu dia mundial di turismo, kico ta nan reflexion, conseho of comentario cu nan lo kier comparti. Varios turista, pero tambe local, a enfatisa riba e importancia pa biaha mas cu bo por, conoce mundo y no preocupa pa gasta bo placa y pasa bon. “Bay pa e trip ey, gasta e placa, no duda,” un turista ta bisa nos.
Otronan a enfatisa riba e importancia di nos hospitalidad tambe, pa trata nos isla bon, cuida nos dushi Aruba p’asina mas por sigui disfruta di dje. Un turista a manda mensahe pa otro bishitantenan of futuro turista cu lo kier bini Aruba: “pasa dushi, bin disfruta di e isla, pero no bay dañ’e pa otro!”
