E parke di molina nobo cu lo a construi na Urirama (Alto Vista) definitivamente no ta sigui, pero esaki no a cay mucho den bon tera cerca e operador. Den negociacionnan cu Gobierno, ta mustra cu lo muda e parke di molina di biento pa parke existente na Vader Piet, na San Nicolas.
Diabierna ultimo Conseho di Minister di Aruba a dicidi pa anula e “hindervergunning” pa e parke di molina di 8 turbina na Urirama. Claro cu kita un permiso asina sin mas lo conduci na daño y perhuicio den Corte, pa cual awor Gobierno ta purbando pa acomoda e compania Hulandes pa yega na un acuerdo cu ta cumbini ambos y sin cu e mester desemboca den batayanan legal.
Habitantenan den vecindario di Alto Vista a protesta desde durante e Gobierno anterior di AVP, ora a anuncia e di dos parke di molina eynan. Nan tabatin miedo specialmente pa nan salud y desordo. Tambe nan tabatin preocupacion pa e interupcion di e famoso luga di peregrinacion, esta e Kapel di Alto Vista. E kapel aki ta un atraccion turistico masha popular.
Na 2014, e Gobierno di e tempo ey a otorga e permiso y tambe a firma un contract di suministro cu e operador Hutting. Como resultado di e mesun acuerdo, Hutting ainda mester sinta na mesa cu e Gobierno actual, incluso si e di dos parke ta bari for di mesa. E obhetivo ta pa pone mas turbina di biento na e parke di molina di Vader Piet na San Nicolas. E compania di Hutting tambe a instala e parke aki na 2008. Despues cu el a haci negoshi cu e Gobierno di MEP, cu awor ta na mando atrobe.
Consumidor di e energia di biento ta WEB, cu ta inclui e coriente aki riba nan red di distribucion. Na e momentonan aki, e ta haciendo un investigacion cuanto turbina di biento por pone acerca. “Nan ta bisa entre 6 y 8, pero e por bira 10 tambe,” segun Hutting a duna di conoce.
