Diamars mainta a habri parlamento c’un manifesto entrega na e presidente di parlamento, Edgard Vrolijk, pa e Asociacion di Fisioterapistanan di Aruba. Aki a expresa nan desacuerdo pa loke ta trata e cortamento den cuido medico cu lo mester bay tuma luga den e lunanan binidero.
Asina presidente dje asociacion, Marlon Maduro a splica cu e prome motibo pa entrega dje manifesto ta cu e profesion di fisioterapista ta hopi importante, specialmente den tempo di pandemia, pa di dos AVF ta di opinion cu den salubridad no ta caminda pa corta, mirando tur loke pueblo ta pasando aden y por ultimo AVF kier haya oido di parlamento como tambe di e minister concerni.
El a vocifera cu AVF kier haya sikiera un oportunidad pa sinta y combersa pa asina yega na un areglo pasobra segun Maduro, e profesion di fisioterapista ta e parti mas importante si kier scapa placa entre e prome cu e di dos liña den cuido medico. Specialista como tambe dokter di cas ta bon na altura dje importancia di e profesion di un fisioterapista. Segun Maduro, desde 8 di september, dia di fisioterapista den cual AVF a tene un rueda di prensa, no a tende nada di minister di salud. Presidente di parlamento na su turno a bisa cu e ta considera e fisioterapistanan como sirbido di pueblo y cu diahuebs awo lo concretisa e comisionnan y lo dirigi e carta pa esakinan pa asina atende mesora cu AVF.
Pa cobertura mas amplio lesa edicion di TREMPAN mañan.
