Recientemente a haya oportunidad di scucha for di John fun, presidente di Fundacion Ban Uni Man pa Cria nos Muchanan riba e acogida cu comunidad a brinda e fundacion pa logra yega na fondo pa continua cu nan bunita ayudo comunitario.
Algun luna atras a trece un preocupacion basta serio na comunidad, relaciona cu e esfuerso grandi cu e fundacion aki a hiba semper, pa brinda cuminda na nos muchanan na scol y cu tabata core peliger. A bin dilanti pa bati bel, cu fondo lo no ta suficiente mas pa carga e cifra grandi di mucha cu tin mester di e ayudo aki. Mas ainda a mira un aumenta drastico, den temporada di Covid y cu a haci cu mester a pidi ayudo na comunidad como cu no por a carga e proyecto aki financieramente mas.
Na momento cu a bati na porta di comunidad, Aruba Marriott ta un di e empresanan grandi, un di e prome nan, a tuma e iniciativa di haci algo pa e fundacion.
Fun sumamente gradici ,ta para dilanti un evento organisa pa Aruba marriott, un Thanksgiving Brunch caminda tur locual cu recauda durante e dia aki lo keda entrega na e fundacion.
Fundacion Ban Uni Man pa Cria nos Muchanan a cuminsa 21 aña pasa, momento cu John Fun tabata traha na hospital caminda a surgi idea di un proyecto comunitario. Di aki e escogencia a nace pa brinda un ayudo na e muchanan cu ta bay scol sin desayuna. Un proyecto cu a cuminsa na 138 mucha y cu a bay ta crece durante aña, a pasa den pandemia cu a aumenta e cifra y cu awe ta sirbi no menos cu 816 mucha nan desayuno tur dia di scol.
Na prome instante e enfoke tabata riba e muchanan di scol basico, pero a bin un demanda mesora cu a mira e proyecto aki lanta pa asina sirbi tanto scol preparatorio como tambe scol secundario. Na e momento aki tin 53 scol cu ta haya ayudo di e fundacion.
Fun ta remarca cu e ta sumamente gradici na e staf di Aruba Marriott. Ademas di tur e diferente empresanan cu a haci un donacion na e fundacion pa contribui cu ingrediente na e brunch di awe, por mira tur e staf presente como gesto boluntario, den nan tempo liber pa asina sirbi/yuda durante e Thanksgiving Brunch cu ta un esfuerso cu cada trahado di Aruba Marriot a haci awe. Un miyon di danki.
