Dia 29 di juni, Aruba Entertainment Center lo ta sede di un di e peleanan mas grandi cu Aruba a yega di conoce. Ta trata di un pelea entre e bringadonan cu ta leyenda, manera Johan Croes vs Joziro Boye miho conoci como the Bulldozer.
Extreme FIghting Championship cu lo tin dos extreme fight. Ta trata di dos pelea di cuater bringado cu lo bringa un stand up fight. Y lo tin dos faha pa esaki. Lo tin tres faha cu e bringado ta sali cu ne pa e e evento.
Algo sigur un bon noticia tabata cu e Golden VIP tabata ful bendi den apenas tres ora di benta. Pa pone un evento asina riba pia, sigur no ta facil. P’esey mes, e organisadonan ta gradici tur e patrocinadonan cu ta haci e evento aki posibel. E anochi aki tambe lo bay tin dos ticket ida y buelta pa Colombia.
Pa e anochi aki tin un total di 17 pelea confirma. E bringado di mas jong di e anochi aki ta Sergio Tromp, cu solamente 17 aña.
Algun di e bringadonan p’e anochi aki
· Alexander Ras
· Armando Pacheco
· Reymond Joët
· Domelzo Schet
· Sebastian Carillo
· Sergio Tromp
· Davon Duncan
· Damian Pinas
· Jean Marc Howell
· Gerrick Bontekoe
· Clayton Raven
· Richard Willems
· Johan Croes
· Joziro Boyé
Naturalmente, e anochi aki no por bay sin siguridad, pa cual esaki ta den man di STR. Ta haci apelacion pa tur esunnan presente n’e evento, pa nan comporta nan mes. Den esaki no ta e caso, automaticamente lo saca e persona afo. E anochi aki nan lo ta esunnan encarga pa zorg cu tur cos cana na ordo, pa sigura cu e publico disfruta di un anochi. Nan ta remarca cu e unico peleanan di e anochi aki lot a den ring. Tur pelea pafo di ring, por ta sigur cu esunnan envolvi lo saca nan afo.
Personal di EMS tambe lo ta presente. Nan lo ta presente pa duna servicio medico, hunto cu e personal di ambulance. Nan lo ta den dos grupo, cual cada uno ta dirigi riba un grupo specifico: Un grupo lo ta enfoca riba e bringadonan como tambe esunnan presente n’e evento aki. Di e manera aki tur hende por ta sigur cu, den cualkier caso, ayudo medico na sitio ta sigura.
Un di e bringadonan di e anochi aki, Richard Willems a indica cu e tin cinco aña sin bringa, pero awo e ta bin bek. Den su ultimo pelea, na final el a keda na decision. Pero e biaha aki, e ta bin pa ‘caba cos’ den e prome dos rond. Hopi ta esunnan cu lo tin gana di wak un pelea entre Richard Willems y Gregory Milliard. Pero no ta kere cu esaki lo por ta e caso, al menos no por lo pronto.
Pa e anochi aki tambe lo tin varios bringado di exterior y tambe lo t’ey Evan Nedd, cu actualmente ta residencia na Hulanda. Como un guest star UFC fighter Josey Elbow tambe ta confirma p’e anochi grandi aki.
Joziro Boyé
Mirando con grandi e pelea lo ta, a puntra e organisadonan pa e posibilidad pa un pay per view, specialmente pa e fanaticonan di MMA den exterior. Un di e leyendanan grandi den MMA ta Joziro Boye, cu a indica cu el a cuminsa train tres siman pasa. Su contrincante lo ta Johan Croes.
Sebastian Carillo
Sebastian Carillo tambe a indica di ta bezig duro riba su training. Pa loke ta su contrincante, e ta haya cu e mester prepara super bon p’e, pa duna e publico presente un bon show.
Jean Marc Howell
Jean Marc Howell tambe ta den ful swing cu su preparacion. E ta haciendo esaki hunto cu su ruman. Howell a sigura cu e ta bay ta e k.o. di e anochi aki y e ta bin dicidido pa logr’e.
Johan Croes
E pelea principal di e anochi, contra di Joziro Boye. P’e pelea aki, e mes a scoge p’e. Boye ta un di e poco atletanan cu ta subi di peso pa bringa cu guynan grandi. Dos atleta cu no ta ria pa otro, lo topa cu otro. E mes tin hopi tempo sin subi ring, pero e ta cla p’e anochi aki.
Gerald Maduro (MC)
Maduro a bisa cu e anochi aki lo tin hopi bon atleta, profesional den nan ramo. Tur ta den preparacion y ainda falta tres luna mas. E anochi aki lo tin varios atleta legendario. Tin un otro atleta a reta Willems, cu ta un persona cu no ta hala atras.
Sigur, un anochi di hopi pelea interesante y cu e fanaticonan di MMA no por perde!
