Na un siman leu di e di 50 edicion di Festival di Dande, cual sigur merece un celebracion den grandi. Festival di Dande ta marca historia pa pais Aruba, unda cu e organisacion di Dande a cuminsa na 1973 y ya e aña aki ta cumpli 50 aña.
Jessica Croes, Organisado di Festival di Dande a cuminsa na bisa di ta contento di cu Festival di Dande ta bek di manera presencial, door di dos aña di manera virtual.
Diahuebs anochi, na Sandra’s Garden, Fundacion Cultural di Festivalnan Folklorico a tira lot pa loke ta e secuencia di Dande Adulto.
Esaki lo ta tuma luga dia 29 di december proximo den Club Caiquetio, cual ta programa pa cuminsa 7:30 pm.
E secuencia ta como lo siguiente:
1. Zonido di Antaño
2. Tipico Ayo
3. Alma Folklorico
4. Tipico Suona
5. Stima Mi
6. Tipico Nos Folklore
7. Sabor Crioyo
Lo tin un total di 24 dande, seis Rey di Rey, shete tipico y tres composicion.
Sigur por ripara cu tabata tin un caida den e total di participante, si mira cu anteriormente por a ripara cu tabata tin riba 30 cantante. Kisas un di e motibonan ta cu mayoria di e tipiconan ta hopi druk y Dande sigur no ta facil pa toca y ta tuma dos pa tres dia di training, pa nan por toc’e.
CONSERVA NOS CULTURA
Pa hopi tempo, nos grandinan a biba cu ne den nos casnan familiar. Y e organisacion ta contento di por a yega na 50 aña di Festival di Dande, cu ta nos folclore y nos cultura, segun Harry Croes, Miembro di Comision. Pero ta importante pa e generacion nobo tuma e rienda over di e Festival di Dande. Un folclore asina bunita y cu tin su historia su tras.
Dande siguramente ta parti di un generacion pa otro generacion, unda cu nos grandinan a tuma e iniciativa pa e Parande di Dande, unda cu hopi di e grandinan no t’ey mas. Pero Croes ta contento cu mas y mas hoben ta participa den Festival di Dande. Nan kier stimula e hobennan, unda den pasado a cuminsa cu e Festival di Dande Infantil y Hubenil, cual nan no a sigui mas cu ne, ya cu e simia tabata planta.
E Festival di Dande Adulto, den transcurso di aña mas y mas hoben a dicidi di bin participa, cual ta algo bunita pa wak con nos hobennan lo sigui carga e batuta di e festival aki.
Esey tabata e fruta cu nan a desea di mira y si nos mes no tin interes pa sigui carga e festival aki, esaki ta bira dificil pa sigui conserv’e.
Pueblo di Aruba, ban apoya nos cultura, pasobra cu ta di nos e ta!
