Banda musical Tsunami den colaboracion cu e damanan di Deep Texture recientemente a presenta nan cancion nobo riba mercado titula, ‘Pakete Kompleto.’ A peticion special di Tsunami, despues di a traha hunto un biaha caba pa cu e tema “Asina Asina” di Maya Marin, a acerca Deep Texture pa crea un cancion pa nan cantante femenino, RuthJean ‘Jane’ Landaeta-Helder.
Aimée Silvanie y Joäne Martina, kende ta traha na Corsou ya pa diesdos aña caba bou di e nomber Deep Texture, a crea e letranan skerpi y e melodianan actual pa e cancion aki. Hunto cu e conocido musico Arubiano, Michael Odor, nan a palabra pa hinca esaki den bachi di un merengue contagioso y bailabel. Michael na su turno a sa di crea cu hopi dedicacion un areglo cu detayenan bunita y cu ta transmiti un dushi vibracion na tur cu scucha e produccion aki.
Poniendo atencion na e letranan, por saca afo cu “Pakete Kompleto”, ta un cancion pa empodera nos hende muhe. Traves di e bos poderoso di Jane, por scucha con e ta describi e dama moderno den e mundo actual como uno puro, suave, fuerte, inteligente, amabel, fiel y hopi atractivo. Cu otro palabra: Un pakete kompleto!
Na mes momento, e ta manda mensahe na e cabayeronan pa corda trata e damanan cu dedicacion. E ta un Reina! Respeta, cuida, duna nan un man y balora nan. Nan merece un dushi trato, pues sorpresa y malcria nan un poco mas. Crea un espacio pa nan sinti nan “safe” y aprecia.
Esaki sigur ta e lenguahe musical pa uni nos damanan bunita y balente den mesun pensamento.
Por scucha “Pakete Kompleto” riba tur plataformanan social y por solicit’e na tur radio emisora. Tambe por mira e video clip cu ta acompaña e cancion aki riba canal di Youtube di Tsunami Aruba. Comparti e cancion aki pa empodera nos damanan rond mundo.
Sigui e desaroyonan di e cancion aki riba e pagina di Facebook y Instagram di Tsunami Aruba y Deep Texture.
