Den un e “Korpsmededeling # 1145” emiti ayera tardi, altocomisario di Cuerpo Policial Aruba, Ramon Arnhem, a anuncia e salida (atrobe) di Trudy Hassell for di e organisacion. E ultimo a laga su puesto di comisario di polis pa e bay bira consehero di Minister Rocco Tjon. Su ultimo funcion den Cuerpo Policial Aruba tabata di Hoofd Algemene Politie Diensten, bou unda ta resorta tur polis uniforma di tur districto di Aruba.
Na su luga ta bin mr. Silvio de Mey, kende no tin e funcion di comisario ainda, pero lo ocupa dicho puesto den forma temporario, pendiente un proceso di reorganisacion den top di polis. Parce cu tin intencion di restructura e Korps Management Team (KMT), den cual por spera salida di algun hefe y entrada di algun nobo.
Silvio de Mey na cabes di polisnan uniforma
Mr. Silvio de Mey ta “Master of tactical Policing”. E ta di e klas di polis di aña 1984. El a huramenta dia 31 di december 1985, algun ora prome cu nos Status Aparte, dilanti Gezaghebber Wernet. E ta parti di e grupo di polis cu a marcheer pa hisa e bandera di nos pais. De Mey a cuminsa traha entre aña 1986-1992 den e seccion di “buitendistricten”. Na 1992 el a fungi como agent eerste klasse y wachtcommandant na districto di Playa. Na aña 2001 el a bay traha na Jeugd en Zeden Politie. Entre aña 2001 pa 2009 a traha na BIZO como hoofdagent eerste klasse. Mientrastanto e no a stop di studia y a caba su Avond HAVO/VWO. A sigui pa Universidad di Aruba na 2002 y na aña 2007 a bira meester in de rechten. Na 2009 a habri e oportunidad pa dos polis cu HBO plus/WO pa bay un opleiding na Hulanda di Tactische Leidinggevenden Leergang (TLL) na nivel 5, considera como un opleiding hoofdinspecteur functie. Ora a finalisa na october 2012 a bira coordinator ploegen na Oranjestad. For di september 2015 a fungi como wnd. districtchef na Oranjestad y na september 2017 di districto di Santa Cruz. Desde dia 3 di april 2018 a nombr’e como Chief of staff of tambe conoci como Hoofd staf Korpschef (HSKC). Aña pasa caba De Mey a neem waar como Hoofd Algemene Politie Diensten y desde awe oficialmente ta fungi como waarnemend Hoofd Algemene Politie Diensten. Pues por mira cu Silvio de Mey a cuminsa for di abou y yega te awe unda e ta. Su anhelo y tarea primordial ta pa traha mas mensgericht y zorg pa tin un bon ambiente di trabou.
Trudy Hassell a bay mas biaha caba
No ta prome biaha cu Hassell ta sali for di Cuerpo Policial Aruba. Den pasado, bou otro gobierno di otro asignatura tambe el a yega di bay ocupa e puesto di hefe na KIA, el a yega di bay Sint Maarten hasta y mas recien tabata hefe di Guarda nos Costa. Pa un of otro motibo, e nunca ta dura den ningun posicion y ta hay’e ta regresa Cuerpo Policial bek. Por corda cu den caso di GnC, el a pone su funcion disponibel tempo di Minister Andin Bikker, cu mesora a reemplas’e cu subinspector Richard Kramers.
E rol di consehero di minister
Kico lo bira e rol di Trudy Hassell banda di Minister Rocco Tjon no ta conoci ainda. Mas bien den e comunicado ta papia cu e lo ocupa un otro funcion den Gobierno di Aruba na e Ministerio di Husticia y Asuntonan Social. Tambe a enfatisa cu a tuma e decision aki den contacto estrecho cu Minister Tjon, altocomisario Arnhem y Comisario Hassell.
