Diasabra anochi a tuma luga e concierto di Romeo Santos, pero cos no a bay manera a planea. Tabatin problema na momento cu a haya sa cu tanto e tecniconan no a yega. Esey a pone cu mester a busca un solucion, di cual Elite Productions a haci tur loke por pa asina trece nan Aruba pa e concierto continua.
Khrish Mathani, promotor, a splica loke a pasa diasabra tabata algo di lamenta y tabata fuera di nan alcance. El a enfatisa cu nan como e organisado di e concierto a cumpli 100% cu nan deber cu e contract di Romeo Santos, logistica, artista y tur cos. Diasabra mainta a surgi un situacion unda cu den ora di mainta Mathani a ricibi un yamada di e booking agent cu tabata cu nan na Peru.
Aki a informa su persona cu nan a yega aeropuerto, pero nan por a subi e vuelo pa Aruba. A informa su persona cu e charter no tabata paga. Den e caso aki, nan a split e gastonan entre tur tres pais, esta Peru, Aruba y Venezuela. Nan a haci e logistica y un di e partidonan nan placa no a clear. Esey tabata Venezuela.
Mathani mes a puntra nan dicon te awo ta avisa, dicon a yega aeropuerto y aborda un avion cu no ta paga. Segun e book agent, door di e drukte nan a kere cu tur cos tabata regla, cada promotor a paga nan parti. Pero e aerolinea a inform nan cu e pago di Venezuela mester drenta sino e avion no por sali pa Aruba.
Esey tabata e situacion cu Mathani a hay’e aden, y aki ta unda nan a bis’e si por voorschot nan e pago di Venezuela pa dialuna of diamars ta regel esey. E momento ey, Mathani tabata kier un siguransa cu e ta haya e placa bek, pasobra ta trata di un suma basta halto. Elite Productions ya caba tabatin hopi gasto. E booking agent a indica cu nan lo pone nan mes responsabel na esun cu lo regla, pero Mathani no tabatin nada riba preto cu blanco.
El a hay’e den un situacion unda cu mester a tuma un decision di sea ta haci esey y salba show di Aruba of ta hala atras y laga nan mes regel e cos, mirando cu Elite si a cumpli. Nan no a haya ningun otro opcion, segun Mathani, unda nan a bolbe puntr’e. Internamente el a opta pa salba e show na Aruba, pasobra ta algo cu nan a bin ta trahando duro p’e. El a forsa pa busca e recurso y pag’e den un ora.
Pa 9:30 am nan a regla tur cos, a pidi pa nan regla e avion ya cu Mathani no tabata kier tin ningun situacion na Aruba. Nan a ricibi e placa, e avion tabata geschedule. Y cu e lo haya e placa bek sea dialuna of diamars.
Tardansa
A informa Mathani cu e vuelo tabata geschedule na orario cu tabata planea pa varios siman esaki yega Aruba 6:00 pm. Di eynan a keda riba schedule, a regel e logistica y transporte. Romeo Santos a yega pa 3:00 pm.
Na momento cu e ora ta yegando, Mathani a yama e management puntrando si tur cos ta on schedule? Elite tabata comunica cu aeropuerto, pero no por a haya e orario di yegada. Aki a haya sa cu e compania di charter a informa nan cu tin retraso y ta yega tiki mas laat. Nan a bisa pa 9:00 pm.
Diferente cambio
Door di e tardansa (delay) aki, a pone cu mester a traha un plan. Elite Productions di su banda a bay n’e hotel pa sinta na mesa. Si e vuelo yega pa 9:00 pm nan tabata oke cu esey, pasobra e schedule no tabata di cambia mucho. Segun Mathani, na Aruba Romeo tabata di subi stage rond 12:00 am. E team di produccion di Elite tabata cla caba y pa varios dia nan tabata den comunicacion cu e team di Romeo.
Un biaha mas a tuma contacto pasobra 9:00 pm tabata yegando, e momento ey a informa Mathani cu e vuelo a lanta for di Peru. Esey a pone cu mester a busca un solucion. E ta haya cu nan no kier a wanta cos scondi, pero nan no tabatin e informacion corecto pa trece dilanti. Cada bes cu tabata bay bek na nan, tabata bisa Elite di tin cambio. Esey a pone cu Elite Productions no por a sali y simplemente bisa di e cambionan, pasobra ta trece panico den e publico.
Concierto den marduga
Romeo Santos a subi 4:00 am riba escenario den Harbour Arena, a pidi despensa y a priminti di lo canta te mainta. Pero pa 5:30 am caba el a despedi y a baha na awa. Por bisa cu, mirando e comentarionan, cu Romeo definitivamente no a logra cumpli cu e expectativa halto di su publico. Pa un artista cu ta exigi tanto, cu si no tin e marca di awa cu el a exigi, e no ta subi escenario, e parti di presentacion a laga di desea, specialmente pasobra pa e ora ey ya mayoria hende tabata cansa y desilusiona caba.
Polis a para e concierto
Aunke cu den contract ta stipula cu e cantante mester presenta pa por lo menos un ora y cuarenticinco minuut, toch polis a dicidi otro. Como cu e presentacion a cuminsa laat, a opta pa para e show 5:30am. Na e momento ey e cantante tabatin apenas un ora y mey cantando. Pero, polis a tene cuenta cu e multitud, cuanto tempo lo dura pa nan sali, pa nan core yega cas, etc. no a hay’e responsabel sigui te mainta. No tur hende a aprecia e decision ey.
Tocante Romeo Santos
Anthony “Romeo” Santos ta naci dia 21 di juli 1981 (42 aña di edad) na New York, Merca. Su tata ta Dominicano y su mama un Puertoriqueña. El a cuminsa canta desde mucha caba den coro di misa.
Cu tempo el a bira e un cantante, compositor y productor musical, conoci den pasado como e cantante principal di e banda Aventura, den unda el a inicia su carera na aña 1994. Na aña 2002, e cancion “Obsesion” tabata number un na Italia durante 16 siman consecutivo. El a saca varios exito cu Aventura prome cu e banda a kibra.
Di e tempo ey, el a sigui su carera musical su so, cu e hib’e na no menos di shete cancion #1 riba e Hot Latin Songs y diesshete #1 riba e Tropical Airplay. Romeo Santos a bende riba 24 miyon copia di su cancionnan, cu ta hacie e artista Latino Americano miho bendi na mundo.
Tocante Elite Productions
Dia prome di september 2023, e compania local Elite Productions & Entertainment ta celebra nan di 16 aniversario. Un compania cu durante añanan a sa di crece y bira e compania di mas grandi den e mundo audiovisual di Caribe.
Pa mas lesa TREMPAN.COM.
