Un rato pasa a sosode un accidente cu tres auto envolvi riba Watty Vos Boulevard. Ta trata di e autonan, Lexus, Altezza y un Nissan. Nan tabata bayendo direccion rotonde Cumana for di rotonde Paperclip na Sero Patrishi. A logra combersa cu dos di e chauffeurnan.
Chauffeur di e Nissan Versa a conta cu; e Altezza a dal tras di e Lexus pa djey e Lexus bin dal su tras. Di otro banda, e chauffeur di e Lexus ta conta cu; t’e Altezza a dal tras di e Versa y el a bin claba den nan. Tur cos ta mustra si cu, berdad, e Altezza a dal tras di e Nissan Versa pa djey e Lexus dal tras di e Altezza. Nos no ta specialista di trafico, e profesionalnan lo documenta y studia con exactamente e accidente a sosode.
E chauffeur di e Versa tabata keha di basta dolor na su lomba mientras esun di e Lexus a ricibi sla na su cabes. Di otro banda, e chauffeur di e Altezza a nenga atencion medico, no ta conoci si e tabata herida of no, a ofrece pa check un cu e otro cu ne, pero el a nenga esaki rotundamente. Na sitio, paramediconan a brinda atencion medico n’e chauffeur di e Versa y e Altezza. Por lo menos pa un ora largo, a cera rotonde Paperclip na Sero Patrishi p’asina e departmentonan concerni atende cu e accidente y tambe e victimanan.
