Na ocasion di e recepcion di despedida di tres studiementor cu a stop cu nan trabao. Director interino di Arubahuis drs. Glenda Hernandez a hiba palabra, unda el a cuminsa na gradici e tres studiementor pa nan dedicacion na e guia di nos studiantenan. Alabes Hernadez a haci uzo di e oportunidad aki pa introduci e dos studiementornan nobo pa reemplasa esunnan cu ta bay. Nathaly Deville-Russell lo tuma e region di Amsterdam y vecindario, mientras cu Rasnaly Cart tin e region di Brabant y Limburg.
Glenda Hernandez den su discurso a para keto na e importancia di e trabao y a bisa cu un bon mentor ta exigi hopi cualidad, manera conocemento di e.o. sistema/stakeholders den educacion y otro area na Hulanda, pero tambe atencion pa e necesidadnan individual di nos studiantenan cu ta yega na un tera completamente straño pa nan. Segun Hernandez, e studiementor ta un guia y un sosten moral pa nos studiante den nan prome aña di studio.
Cu e baymento di tres studiementor a cuminsa cu e proceso pa busca un reemplasante pa nan. E dos studiementornan cu ta bay tuma e trabao over di Swinda y Lourdes ta pa e region di Brabant y Limburg Rasnaly Cart. Rasnaly ta trahando como decano na un scol secundario desde 2009, esta diescuater aña. E ta traha cu e hobennan ya pa binti aña caba y tin un network grandi bou di e decanonan di e scolnan di Mavo, Havo, VWO y MBO. Nathaly ta tuma e region di Lourdes. E ta trahando actualmente na Hogeschool di Amsterdam como “student mobility counselor” y e ta eherciendo e trabao aki desde 2005, dus pa diesocho aña y e ta encarga cu guia di studiante internacional hunto cu un team di dies persona.
Pa loke ta Utrecht e nombramento ta andando ainda y Glenda a bisa di ta spera cu pronto esaki ta rond. Tambe Glenda a enfatisa cu e trabao no ta facil, e ta bin cu hopi reto, sinembargo e ta desea e studiementornan nobo hopi exito.
Despues cu Minister Plenipotenciario mr. Ady Thijsen a tene su discurso pa yama danki na e tres studiementornan, Donna van Heukelem-Kock a hiba palabra den nomber di e team di mentornan. Donna a cuminsa na bisa cu aunke cu un studiementor tabata mas largo cu e otro, cada un tabata tin nan mesun style. “Swinda por ehempel tabata tin mas un rol como mama di e studiantenan. Mientras Omar y Lourdes tabata reta e studiantenan y haci mas un apelacion ariba nan independencia. Un guia diferente, pero un cos si tur tres tabata tin comun: nan a traha cu hopi amor incansabel na bienestar di nos studiantenan Arubiano. Enfrentando yen di curashi diferente obstaculo y retonan cu no ta haci e trabao di mentor facil”, asina Donna a bisa.
“Den tur e añanan cu a transcuri mundo a cambia, e comunidad na Aruba y Hulanda a cambia y e opvang y guia di nos studiantenan tambe a cambia. Pero un cos si, tur aña ta keda demostra: boso como mentor a haci un diferencia grandi den e bida di nos studiantenan. Pasobra boso a hari cu nan, boso a yora cu nan, boso a zundra nan y boso a yuda nan unda cu boso por den un luga completamente straño pa nan. Y mi ta sigur cu boso por confirma cu no tin nada mas bunita di mira e gratitud den e mirada di nos studiantenan.”
Finalmente Donna a gradici e studiementornan pa nan colegialidad y a yama bon bini na e team di studiementor Nathaly y Rasnaly. Tambe a desea nan exito cu e trabao.
