Tur aña durante Aña Parlamentario por mira e escogencia di vestuario di minister- y parlamentarionan. E politiconan femenino ta scoge un shimis y ta combin’e cu sombre y handschoen. Awe mainta a tuma luga apertura di aña parlamentario 2020-2021, manera ta custumber, riba e di dos diamars di luna di september.
Prome Minister mr. Evelyn Wever-Croes a bisti un shimis royal blue y un sombre di flor color blanco. E mandatario a bisa cu e vestuario cu e ta scoge no tin nificacion special. Su shimis ta cosi aki na Aruba mes pa señora Ligia. E color ta un cu e gusta y ta resalta bon pa un momento solemne. Ta importante cu e sombre ta combina, pero tambe pa mustra e aspecto solemne di e celebracion.
Presidente di Parlamento mr. Juan Thijsen tin diferente color di dashi, pero a scoge pa bisti un geel cu figura riba dje. Su escogencia di dashi ta pa motibo cu el a pasa hopi cos den diescinco aña cu ne y tin un nificacion.
Parlamentario di AVP, Jennifer Arends-Reyes, a scoge un shimis, un bandeau y handschoen color preto p’e aña arlamentario. El a bisa cu ta scoge un color cu ta refleha riba tur cos cu a pasa den transcurso di aña parlamentario pasa, pero tambe tur loke ta bay bin. Su escogencia tabata conscientemente no solamente di protesta so pero un tiki solemne den e parti cu mundo henter ta pasa den dje cu e pandemia.
