E trahadonan di FMAA a dicidi pa pone trabao abao dialuna mainta, despues cu minister a cancela e reunion siman pasa. Un reunion cu a programa tres siman pasa.
Segun Edmundo Marlin di SEPPA, esaki tabata cu e trahadonan tabata kier pa tin un reunion cu e minister, algo cu a pidi for di aña pasa na Mei. Mirando cu nan tin hopi preocupacion, di entre otro mal maneho cu nota tumando luga, no tin guia den e fundacion y e trahadonan tabata kier un reunion riba esaki cu e minister.
Despues cu e minister a concede e fecha, 10 minuut prome cu e reunion mester a tuma luga, a notifica cu e minister a cancela e reunion.
SEPPA a tuma contacto cu oficina di minister pa haya sa ki dia mester sinta bek, a informa SEPPA, cu diahuebs lo yama bek pa por haya un fecha nobo.
Diahuebs a pasa, diabierna a pasa y dialuna mainta a dicidi ta basta y a dicidi pa walk out.
Ta spera cu minister compronde e seriedad. A mustra minister na mesa tres siman pasa cu a reuni cun’e, cu e trahadonan ta dicidido kier solucion pa e problemanan cu tin awor aki na FMAA.
Si minister no ta diligente suficiente e por spera mas accion di e trahadonan. Loke cu Marlin a comenta tambe, cu e trahadonan no ta bay hala atras mas, si minister no pone un fecha mas pronto posibel.
Preocupacion
Un di e preocupacionnan cu tin, ta cu no tin maneho den FMAA. Minister mester compronde cu a papia cu diferente stakeholder pa delinea su maneho pa adiccion y cu e propio trahadonan mes, e no a papia cu nan. E trahadonan ta hayando cu si mester delinea un maneho, nan no tin problema cu esey, pero scucha nan tambe, cu ta trahando riba veld, haciendo e trabao pa yuda delinea e maneho di e minister.
Banda di esey tambe tin hopi preocupacion di e trahadonan, riba cosnan cu ta tumando luga interno den e fundacion FMAA, cu e trahadonan kier pa e minister compronde y wak con pa soluciona e problema.
Un di e cosnan cu sigur falta eyden, ta un director. No tin director, segun Marlin. Automaticamente no tin guia. Ken por atende riba kico. Tur esaki ta treciendo problema cerca e trahadonan.
Un yiu sin mama
Segun Edmundo Marlin, cada gobierno cu sinta, semper ta bin cu su maneho, con e kier delini’e, con e kier hiba maneho pa su departamentonan. No tin nada diferente pa minister di Salubridad delinea un maneho riba salubridad, cu un parti di dje, cu ta toca e parti di adiccion.
Tur hende sa cu tin un problema hopi grandi den comunidad cu ta adiccion. Straño cu e por zona, adiccion ta forma parti di e crisisplan. Con por ta posibel cu e minister no por sinta cu e trahadonan y scucha nan dolor cu nan ta pasando aden diariamente.
Tin hopi problema social den nos comunidad y adiccion ta un di nan. Con bo no kier sinta scucha e trahadonan aki, cu tin cu yudabo desplega bo maneho cu bo kier hiba y tin cu bay duna e servicio manera mester ta pa yuda soluciona e problemanan di adiccion cu tin.
Esey pa SEPPA, ta incomprendibel cu for di Mei aña pasa ta pidiendo e minister pa sinta cu e trahadonan, pa scucha nan dolor cu nan ta confrontando den FMAA y tambe pa yud’e pa asina e por delinea un maneho pa adiccion. Pero e no kier.
A scucha tur otro hende, tur otro stakeholder, menos e trahadonan.
Y kico awo Marlin a comenta cu si minister no pone un fecha y horario nobo pa sinta y scucha e trahadonan, e trahadonan ta dicidi pa bay all out. Esey lo bay bin na su debido momento. Marlin ta spera cu e minister ta diligente pa yama un reunion mas lihe posibel pa sinta papia cu e trahadonan y scucha nan.
